ತತ್ರ ಯಃ ಉಪಾಧಿಕೃತಃ ಸಂಸಾರೀ ವಿದ್ಯಾವಿದ್ಯಯೋರಧಿಕೃತೋ ಮೋಕ್ಷಗಮನಾಯ ಸಂಸಾರಗಮನಾಯ ಚ, ತಸ್ಯ ತದುಭಯಗಮನೇ ಸಾಧನೋ ರಥಃ ಕಲ್ಪ್ಯತೇ — ತತ್ರಾತ್ಮಾನಮ್ ಋತಪಂ ಸಂಸಾರಿಣಂ ರಥಿನಂ ರಥಸ್ವಾಮಿನಂ ವಿದ್ಧಿ ವಿಜಾನೀಹಿ ; ಶರೀರಂ ರಥಮ್ ಏವ ತು ರಥಬದ್ಧಹಯಸ್ಥಾನೀಯೈರಿಂದ್ರಿಯೈರಾಕೃಷ್ಯಮಾಣತ್ವಾಚ್ಛರೀರಸ್ಯ । ಬುದ್ಧಿಂ ತು ಅಧ್ಯವಸಾಯಲಕ್ಷಣಾಂ ಸಾರಥಿಂ ವಿದ್ಧಿ ; ಬುದ್ಧಿನೇತೃಪ್ರಧಾನತ್ವಾಚ್ಛರೀರಸ್ಯ, ಸಾರಥಿನೇತೃಪ್ರಧಾನ ಇವ ರಥಃ । ಸರ್ವಂ ಹಿ ದೇಹಗತಂ ಕಾರ್ಯಂ ಬುದ್ಧಿಕರ್ತವ್ಯಮೇವ ಪ್ರಾಯೇಣ । ಮನಃ ಸಂಕಲ್ಪವಿಕಲ್ಪಾದಿಲಕ್ಷಣಂ ಪ್ರಗ್ರಹಮೇವ ಚ ರಶನಾಮೇವ ವಿದ್ಧಿ । ಮನಸಾ ಹಿ ಪ್ರಗೃಹೀತಾನಿ ಶ್ರೋತ್ರಾದೀನಿ ಕರಣಾನಿ ಪ್ರವರ್ತಂತೇ ರಶನಯೇವಾಶ್ವಾಃ ॥