ಇಂದ್ರಿಯಾಣಿ ಚಕ್ಷುರಾದೀನಿ ಹಯಾನಾಹುಃ ರಥಕಲ್ಪನಾಕುಶಲಾಃ, ಶರೀರರಥಾಕರ್ಷಣಸಾಮಾನ್ಯಾತ್ । ತೇಷು ಇಂದ್ರಿಯೇಷು ಹಯತ್ವೇನ ಪರಿಕಲ್ಪಿತೇಷು ಗೋಚರಾನ್ ಮಾರ್ಗಾನ್ ರೂಪಾದೀನ್ವಿಷಯಾನ್ ವಿದ್ಧಿ । ಆತ್ಮೇಂದ್ರಿಯಮನೋಯುಕ್ತಂ ಶರೀರೇಂದ್ರಿಯಮನೋಭಿಃ ಸಹಿತಂ ಸಂಯುತಮಾತ್ಮಾನಂ ಭೋಕ್ತೇತಿ ಸಂಸಾರೀತಿ ಆಹುಃ ಮನೀಷಿಣಃ ವಿವೇಕಿನಃ । ನ ಹಿ ಕೇವಲಸ್ಯಾತ್ಮನೋ ಭೋಕ್ತೃತ್ವಮಸ್ತಿ ; ಬುದ್ಧ್ಯಾದ್ಯುಪಾಧಿಕೃತಮೇವ ತಸ್ಯ ಭೋಕ್ತೃತ್ವಮ್ । ತಥಾ ಚ ಶ್ರುತ್ಯಂತರಂ ಕೇವಲಸ್ಯಾಭೋಕ್ತೃತ್ವಮೇವ ದರ್ಶಯತಿ — ‘ಧ್ಯಾಯತೀವ ಲೇಲಾಯತೀವ’ (ಬೃ. ಉ. ೪ । ೩ । ೭) ಇತ್ಯಾದಿ । ಏವಂ ಚ ಸತಿ ವಕ್ಷ್ಯಮಾಣರಥಕಲ್ಪನಯಾ ವೈಷ್ಣವಸ್ಯ ಪದಸ್ಯಾತ್ಮತಯಾ ಪ್ರತಿಪತ್ತಿರುಪಪದ್ಯತೇ, ನಾನ್ಯಥಾ, ಸ್ವಭಾವಾನತಿಕ್ರಮಾತ್ ॥