ಸರ್ಪಾದ್ಯಧ್ಯಾಸಾಧಿಷ್ಠಾನರಜ್ಜುವಚ್ಛ್ರೋತ್ರಾದ್ಯಧ್ಯಾಸಾಧಿಷ್ಠಾನಚೈತನ್ಯಂ ಶ್ರೋತ್ರಸ್ಯ ಶ್ರೋತ್ರಮಿತ್ಯಾದಿನಾ ಲಕ್ಷಿತಂ ತರ್ಹಿ ರಜ್ಜುವದಧಿಷ್ಠಾನತ್ವಾದ್ವಿಷಯತ್ವಪ್ರಸಂಗ ಇತಿ ಶಂಕಾಂ ನಿವರ್ತಯತಿ –

ಯಸ್ಮಾಚ್ಛ್ರೋತ್ರಾದೇರಪೀತ್ಯಾದಿನಾ ।

ಅಧ್ಯಸ್ತಸ್ಯ ಹ್ಯಧಿಷ್ಠಾನಮೇವ ಸ್ವರೂಪಮಾದ್ಯಂತಮಧ್ಯೇಷು ತದವ್ಯಭಿಚಾರಾತ್ಸ್ವರೂಪವಿಷಯತಾ ಚ ನ ಪದಾರ್ಥಧರ್ಮಸ್ತತೋಽಪ್ರಯೋಜಕೋಽಯಂ ಹೇತುರಿತ್ಯರ್ಥಃ ।

ಅವಿಷಯತ್ವಾತ್ತರ್ಹಿ ಶಾಸ್ತ್ರಾಚಾರ್ಯೋಪದೇಶ್ಯತ್ವಮಪಿ ನ ಸ್ಯಾದಿತ್ಯಾಶಂಕ್ಯ ನಾಸ್ತ್ಯೇವ ವಾಸ್ತವಮಿತ್ಯಾಹ –

ಇಂದ್ರಿಯಮನೋಭ್ಯಾಂ ಹೀತಿ ।

ಬ್ರಾಹ್ಮಣೋಽಯಮಿತ್ಯಾದಿ ಜಾತಿತಃ ಕೃಷ್ಣೋಽಯಮಿತ್ಯಾದಿ ಗುಣತಃ ಪಾಚಕೋಽಯಮಿತ್ಯಾದಿ ಕ್ರಿಯಾತೋ ರಾಜಪುರುಷ ಇತ್ಯಾದಿ ಸಂಬಂಧವಿಶೇಷತ ಉಪದಿಶ್ಯತೇ । ಬ್ರಹ್ಮ ತು ನ ಜಾತ್ಯಾದಿಮತ್ । “ಕೇವಲೋ ನಿರ್ಗುಣಶ್ಚ”(ಶ್ವೇ. ಉ. ೬ । ೧೧) ಇತ್ಯಾದಿಶ್ರುತೇಃ ।

ಅಜ್ಞೇನಾಽಽಗಮಸ್ಯ ಭೇದೇನ ಪ್ರತಿಪನ್ನತ್ವಾತ್ತದ್ದೃಷ್ಟ್ಯಾಽಽಚಾರ್ಯಸ್ಯಾಪ್ಯವಿದ್ಯಾಲೇಶೋತ್ಥದೃಷ್ಟ್ಯಾ ವ್ಯಾವಹಾರಿಕ ಉಪದೇಶ ಉಪಪದ್ಯತ ಆಗಮತಸ್ತಸ್ಯೈವಾಽಽತ್ಮಾನಂ ಬ್ರಹ್ಮರೂಪೇಣ ಲಕ್ಷಯಿತುಂ ಯೋಗ್ಯತಾತಿಶಯವತ್ತ್ವಾದಿತ್ಯಭಿಪ್ರೇತ್ಯಾಹ –

ಅತ್ಯಂತಮೇವೇತಿ ।

ವಾಕ್ಯಸ್ಯ ಪದಾರ್ಥಾನ್ವ್ಯಾಖ್ಯಾಯ ತಾತ್ಪರ್ಯಂ ದರ್ಶಯಿತುಮುಪಕ್ರಮತೇ –

ಯದ್ವಿದಿತಂ ತದಲ್ಪಮಿತ್ಯಾದಿನಾ ।

ಯದ್ವೇದಿತುರನ್ಯತ್ತದ್ವಿದಿತಮವಿದಿತಂ ಚೇತಿ ದ್ವಯೀ ಗತಿಃ । ತತೋ ವಿದಿತತ್ವಾವಿದಿತತ್ವನಿಷೇಧೇನ ವೇದಿತುಃ ಸ್ವರೂಪಂ ಬ್ರಹ್ಮೇತ್ಯತ್ರ ತಾತ್ಪರ್ಯಮಾಗಮಸ್ಯೇತ್ಯಾಹ –

ನ ಹ್ಯನ್ಯಸ್ಯೇತಿ ॥ ೩ ॥