సర్పాద్యధ్యాసాధిష్ఠానరజ్జువచ్ఛ్రోత్రాద్యధ్యాసాధిష్ఠానచైతన్యం శ్రోత్రస్య శ్రోత్రమిత్యాదినా లక్షితం తర్హి రజ్జువదధిష్ఠానత్వాద్విషయత్వప్రసఙ్గ ఇతి శఙ్కాం నివర్తయతి –
యస్మాచ్ఛ్రోత్రాదేరపీత్యాదినా ।
అధ్యస్తస్య హ్యధిష్ఠానమేవ స్వరూపమాద్యన్తమధ్యేషు తదవ్యభిచారాత్స్వరూపవిషయతా చ న పదార్థధర్మస్తతోఽప్రయోజకోఽయం హేతురిత్యర్థః ।
అవిషయత్వాత్తర్హి శాస్త్రాచార్యోపదేశ్యత్వమపి న స్యాదిత్యాశఙ్క్య నాస్త్యేవ వాస్తవమిత్యాహ –
ఇన్ద్రియమనోభ్యాం హీతి ।
బ్రాహ్మణోఽయమిత్యాది జాతితః కృష్ణోఽయమిత్యాది గుణతః పాచకోఽయమిత్యాది క్రియాతో రాజపురుష ఇత్యాది సమ్బన్ధవిశేషత ఉపదిశ్యతే । బ్రహ్మ తు న జాత్యాదిమత్ । “కేవలో నిర్గుణశ్చ”(శ్వే. ఉ. ౬ । ౧౧) ఇత్యాదిశ్రుతేః ।
అజ్ఞేనాఽఽగమస్య భేదేన ప్రతిపన్నత్వాత్తద్దృష్ట్యాఽఽచార్యస్యాప్యవిద్యాలేశోత్థదృష్ట్యా వ్యావహారిక ఉపదేశ ఉపపద్యత ఆగమతస్తస్యైవాఽఽత్మానం బ్రహ్మరూపేణ లక్షయితుం యోగ్యతాతిశయవత్త్వాదిత్యభిప్రేత్యాహ –
అత్యన్తమేవేతి ।
వాక్యస్య పదార్థాన్వ్యాఖ్యాయ తాత్పర్యం దర్శయితుముపక్రమతే –
యద్విదితం తదల్పమిత్యాదినా ।
యద్వేదితురన్యత్తద్విదితమవిదితం చేతి ద్వయీ గతిః । తతో విదితత్వావిదితత్వనిషేధేన వేదితుః స్వరూపం బ్రహ్మేత్యత్ర తాత్పర్యమాగమస్యేత్యాహ –
న హ్యన్యస్యేతి ॥ ౩ ॥