अद्वैतशारदा | दक्षिणाम्नाय श्रीशारदापीठम्, शृङ्गेरी

ಓಂಕಾರಂ ಪಾದಶೋ ವಿದ್ಯಾತ್ಪಾದಾ ಮಾತ್ರಾ ನ ಸಂಶಯಃ ।
ಓಂಕಾರಂ ಪಾದಶೋ ಜ್ಞಾತ್ವಾ ನ ಕಿಂಚಿದಪಿ ಚಿಂತಯೇತ್ ॥ ೨೪ ॥

ಪೂರ್ವವದತ್ರೈತೇ ಶ್ಲೋಕಾ ಭವಂತಿ । ಯಥೋಕ್ತೈಃ ಸಾಮಾನ್ಯೈಃ ಪಾದಾ ಏವ ಮಾತ್ರಾಃ, ಮಾತ್ರಾಶ್ಚ ಪಾದಾಃ ; ತಸ್ಮಾತ್ ಓಂಕಾರಂ ಪಾದಶಃ ವಿದ್ಯಾತ್ ಇತ್ಯರ್ಥಃ । ಏವಮೋಂಕಾರೇ ಜ್ಞಾತೇ ದೃಷ್ಟಾರ್ಥಮದೃಷ್ಟಾರ್ಥಂ ವಾ ನ ಕಿಂಚಿದಪಿ ಪ್ರಯೋಜನಂ ಚಿಂತಯೇತ್ , ಕೃತಾರ್ಥತ್ವಾದಿತ್ಯರ್ಥಃ ॥

ಪೂರ್ವವದಿತಿ ; ಪಾದಾ ಇತಿ ; ಓಂಕಾರಮಿತಿ ; ಓಂಕಾರಮಿತಿ ; ಏವಮಿತಿ ॥೨೪॥ ;

ಯಥಾ ಪೂರ್ವಮಾಚಾರ್ಯೇಣ ಶ್ರುತ್ಯರ್ಥಪ್ರಕಾಶಕಾಃ ಶ್ಲೋಕಾಃ ಪ್ರಣೀತಾಸ್ತಥೋತ್ತರೇಽಪಿ ಶ್ಲೋಕಾಃ ಶ್ರುತ್ಯುಕ್ತೇಽರ್ಥ ಏವ ಸಂಭವಂತೀತ್ಯಾಹ –

ಪೂರ್ವವದಿತಿ ।

ಓಂಕಾರಸ್ಯ ಪಾದಶೋ ವಿದ್ಯಾ ಕೀದೃಶೀತ್ಯಾಶಂಕ್ಯಾಽಽಹ –

ಪಾದಾ ಇತಿ ।

ಪಾದಾನಾಂ ಮಾತ್ರಾಣಾಂ ಚಾನ್ಯೋನ್ಯಮೇಕತ್ವಂ ಕೃತ್ವಾ ತದ್ವಿಭಾಗವಿಧುರಮೋಂಕಾರಂ ಬ್ರಹ್ಮಬುದ್ಧ್ಯಾ ಧ್ಯಾಯತೋ ಭವತಿ ಕೃತಾರ್ಥೇತೇತಿ ದರ್ಶಯತಿ –

ಓಂಕಾರಮಿತಿ ।

ತಸ್ಮಾತ್ ಪಾದಾನಾಂ ಮಾತ್ರಾಣಾಂ ಚಾನ್ಯೋನ್ಯಮೇಕತ್ವಾದಿತ್ಯರ್ಥಃ ।

ತದೇಕತ್ವಂ ಪುರಸ್ಕೃತ್ಯೋಂಕಾರಮುಭಯವಿಭಾಗಶೂನ್ಯಂ ಬ್ರಹ್ಮಬುದ್ಧ್ಯಾ ಜಾನೀಯಾದಿತ್ಯಾಹ –

ಓಂಕಾರಮಿತಿ ।

ಉತ್ತರಾರ್ಧಸ್ಯ ತಾತ್ಪರ್ಯಮಾಹ –

ಏವಮಿತಿ ॥೨೪॥