मन एवाऽऽत्मेति –
लोकायतभेदः ।
तदपि भ्रान्तिमात्रम्। तस्य स्वातन्त्र्ये क्लेशप्राप्त्यनुपपत्तेः।
अस्वातन्त्र्ये च घटवदनात्मत्वात् करणत्वाच्च दीपवदात्मत्वायोगादित्याह –
मन इति ।
बुद्धिरेवाऽऽत्मेति बौद्धाः।
तेषामपि भ्रान्तिमात्रमेव तत् सुषुप्ते व्यभिचाराद् वेद्यस्य च घटवदतिरिक्तवेद्यत्वादित्याह –
बुद्धिरिति ।
चित्तमेव बाह्याकारशून्यं विज्ञानम्। तदेवाऽऽत्मेत्यपरे।
तत्रापि प्रागुक्तन्यायाविशेषात्तुल्यं भ्रान्तित्वमित्याह –
चित्तमिति ।
धर्माधर्मौ विधिनिषेधचोदनागम्यौ परमार्थाविति –
मीमांसकाः ।
तदपि कल्पनामात्रम्।
देशकालादिषु धर्माधर्मयोर्विप्रतिपत्तिदर्शनादित्याह –
धर्मेति ॥२५॥