కథమ్ ? యస్య అగ్నిహోత్రిణః అగ్నిహోత్రమ్ అదర్శం దర్శాఖ్యేన కర్మణా వర్జితమ్ । అగ్నిహోత్రిభిరవశ్యకర్తవ్యత్వాద్దర్శస్య । అగ్నిహోత్రిసమ్బన్ధ్యగ్నిహోత్రవిశేషణమివ భవతి । తదక్రియమాణమిత్యేతత్ । తథా అపౌర్ణమాసమ్ ఇత్యాదిష్వప్యగ్నిహోత్రవిశేషణత్వం ద్రష్టవ్యమ్ । అగ్నిహోత్రాఙ్గత్వస్యావిశిష్టత్వాత్ । అపౌర్ణమాసం పౌర్ణమాసకర్మవర్జితమ్ । అచాతుర్మాస్యం చాతుర్మాస్యకర్మవర్జితమ్ । అనాగ్రయణమ్ ఆగ్రయణం శరదాదిషు కర్తవ్యమ్ , తచ్చ న క్రియతే యస్య తత్తథా । అతిథివర్జితం చ అతిథిపూజనం చాహన్యహన్యక్రియమాణం యస్య । స్వయం సమ్యగగ్నిహోత్రకాలే అహుతమ్ । అదర్శాదివత్ అవైశ్వదేవం వైశ్వదేవకర్మవర్జితమ్ । హూయమానమప్యవిధినా హుతమ్ అయథాహుతమిత్యేతత్ । ఎవం దుఃసమ్పాదితమసమ్పాదితమగ్నిహోత్రాద్యుపలక్షితం కర్మ కిం కరోతీత్యుచ్యతే — ఆసప్తమాన్ సప్తమసహితాన్ తస్య కర్తుర్లోకాన్ హినస్తి హినస్తీవ ఆయాసమాత్రఫలత్వాత్ । సమ్యక్ క్రియమాణేషు హి కర్మసు కర్మపరిణామానురూప్యేణ భూరాదయః సత్యాన్తాః సప్త లోకాః ఫలం ప్రాప్తవ్యమ్ । తే లోకాః ఎవంభూతేనాగ్నిహోత్రాదికర్మణా త్వప్రాప్యత్వాద్ధింస్యన్త ఇవ, ఆయాసమాత్రం త్వవ్యభిచారీత్యతో హినస్తీత్యుచ్యతే । పిణ్డదానాద్యనుగ్రహేణ వా సమ్బధ్యమానాః పితృపితామహప్రపితామహాః పుత్రపౌత్రప్రపౌత్రాః స్వాత్మోపకారాః సప్త లోకా ఉక్తప్రకారేణాగ్నిహోత్రాదినా న భవన్తీతి హింస్యన్త ఇత్యుచ్యతే ॥