తత్రాగ్నిహోత్రమేవ తావత్ప్రథమం ప్రదర్శనార్థముచ్యతే, సర్వకర్మణాం ప్రాథమ్యాత్ । తత్కథమ్ ? యదైవ ఇన్ధనైరభ్యాహితైః సమ్యగిద్ధే సమిద్ధే దీప్తే హవ్యవాహనే లేలాయతే చలతి అర్చిః ; తదా తస్మిన్కాలే లేలాయమానే చలత్యర్చిషి ఆజ్యభాగౌ ఆజ్యభాగయోః అన్తరేణ మధ్యే ఆవాపస్థానే ఆహుతీః ప్రతిపాదయేత్ ప్రక్షిపేత్ దేవతాముద్దిశ్య । అనేకాహఃప్రయోగాపేక్షయా ఆహుతీరితి బహువచనమ్ । ఎష సమ్యగాహుతిప్రక్షేపాదిలక్షణః కర్మమార్గో లోకప్రాప్తయే పన్థాః । తస్య చ సమ్యక్కరణం దుష్కరమ్ ; విపత్తయస్త్వనేకా భవన్తి ॥