ప్లవా హ్యేతే అదృఢా యజ్ఞరూపా అష్టాదశోక్తమవరం యేషు కర్మ ।
ఎతచ్ఛ్రేయో యేఽభినన్దన్తి మూఢా జరామృత్యుం తే పునరేవాపి యన్తి ॥ ౭ ॥
ఎతచ్చ జ్ఞానరహితం కర్మైతావత్ఫలమవిద్యాకామకర్మకార్యమ్ అతోఽసారం దుఃఖమూలమితి నిన్ద్యతే — ప్లవాః వినాశిన ఇత్యర్థః । హి యస్మాత్ ఎతే అదృఢాః అస్థిరాః యజ్ఞరూపాః యజ్ఞస్య రూపాణి యజ్ఞరూపాః యజ్ఞనిర్వర్తకాః అష్టాదశ అష్టాదశసఙ్ఖ్యాకాః షోడశర్త్విజః పత్నీ యజమానశ్చేత్యష్టాదశ । ఎతదాశ్రయం కర్మ ఉక్తం కథితం శాస్త్రేణ యేషు అష్టాదశసు అవరం కేవలం జ్ఞానవర్జితం కర్మ । అతస్తేషామవరకర్మాశ్రయాణామష్టాదశానామదృఢతయా ప్లవత్వాత్ప్లవతే సహ ఫలేన తత్సాధ్యం కర్మ ; కుణ్డవినాశాదివ క్షీరదధ్యాదీనాం తత్స్థానాం నాశః ; యత ఎవమ్ ఎతత్ కర్మ శ్రేయః శ్రేయఃసాధనమితి యే అభినన్దన్తి అభిహృష్యన్తి అవివేకినః మూఢాః, అతః తే జరాం చ మృత్యుం చ జరామృత్యుం కఞ్చిత్కాలం స్వర్గే స్థిత్వా పునరేవ అపి యన్తి భూయోఽపి గచ్ఛన్తి ॥