అవిద్యాయాం బహుధా వర్తమానా వయం కృతార్థా ఇత్యభిమన్యన్తి బాలాః ।
యత్కర్మిణో న ప్రవేదయన్తి రాగాత్తేనాతురాః క్షీణలోకాశ్చ్యవన్తే ॥ ౯ ॥
కిఞ్చ, అవిద్యాయాం బహుధా బహుప్రకారం వర్తమానాః వయమేవ కృతార్థాః కృతప్రయోజనాః ఇతి ఎవమ్ అభిమన్యన్తి అభిమన్యన్తే అభిమానం కుర్వన్తి బాలాః అజ్ఞానినః । యత్ యస్మాదేవం కర్మిణః న ప్రవేదయన్తి తత్త్వం న జానన్తి రాగాత్ కర్మఫలరాగాభిభవనిమిత్తమ్ , తేన కారణేన ఆతురాః దుఃఖార్తాః సన్తః క్షీణలోకాః క్షీణకర్మఫలాః స్వర్గలోకాత్ చ్యవన్తే ॥