ఇష్టాపూర్తమ్ ఇష్టం యాగాది శ్రౌతం కర్మ పూర్తం స్మార్తం వాపీకూపతడాగాదికర్మ మన్యమానాః ఎతదేవాతిశయేన పురుషార్థసాధనం వరిష్ఠం ప్రధానమితి చిన్తయన్తః, అన్యత్ ఆత్మజ్ఞానాఖ్యం శ్రేయఃసాధనం న వేదయన్తే న జానన్తి ప్రమూఢాః పుత్రపశుబాన్ధవాదిషు ప్రమత్తతయా మూఢాః ; తే చ నాకస్య స్వర్గస్య పృష్ఠే ఉపరిస్థానే సుకృతే భోగాయతనే అనుభూత్వా అనుభూయ కర్మఫలం పునః ఇమం లోకం మానుషమ్ అస్మాత్ హీనతరం వా తిర్యఙ్నరకాదిలక్షణం యథాకర్మశేషం విశన్తి ॥