యే పునస్తద్విపరీతజ్ఞానయుక్తా వానప్రస్థాః సంన్యాసినశ్చ, తపఃశ్రద్ధే హి తపః స్వాశ్రమవిహితం కర్మ, శ్రద్ధా హిరణ్యగర్భాదివిషయా విద్యా, తే తపఃశ్రద్ధే ఉపవసన్తి సేవంతేఽరణ్యే వర్తమానాః సన్తః । శాన్తాః ఉపరతకరణగ్రామాః । విద్వాంసః గృహస్థాశ్చ జ్ఞానప్రధానా ఇత్యర్థః । భైక్షచర్యాం చరన్తః పరిగ్రహాభావాదుపవసన్త్యరణ్యే ఇతి సమ్బన్ధః । సూర్యద్వారేణ సూర్యోపలక్షితేనోత్తరేణ పథా తే విరజాః విరజసః, క్షీణపుణ్యపాపకర్మాణః సన్త ఇత్యర్థః । ప్రయాన్తి ప్రకర్షేణ యాన్తి యత్ర యస్మిన్సత్యలోకాదౌ అమృతః స పురుషః ప్రథమజో హిరణ్యగర్భః హి అవ్యయాత్మా అవ్యయస్వభావో యావత్సంసారస్థాయీ । ఎతదన్తాస్తు సంసారగతయోఽపరవిద్యాగమ్యాః । నన్వేతం మోక్షమిచ్ఛన్తి కేచిత్ । న, ‘ఇహైవ సర్వే ప్రవిలీయన్తి కామాః’ (ము. ఉ. ౩ । ౨ । ౨) ‘తే సర్వగం సర్వతః ప్రాప్య ధీరా యుక్తాత్మానః సర్వమేవావిశన్తి’ (ము. ఉ. ౩ । ౨ । ౫) ఇత్యాదిశ్రుతిభ్యః ; అప్రకరణాచ్చ । అపరవిద్యాప్రకరణే హి ప్రవృత్తే న హ్యకస్మాన్మోక్షప్రసఙ్గోఽస్తి । విరజస్త్వం త్వాపేక్షికమ్ । సమస్తమపరవిద్యాకార్యం సాధ్యసాధనలక్షణం క్రియాకారకఫలభేదభిన్నం ద్వైతమ్ ఎతావదేవ యద్ధిరణ్యగర్భప్రాప్త్యవసానమ్ । తథా చ మనునోక్తం స్థావరాద్యాం సంసారగతిమనుక్రామతా — ‘బ్రహ్మా విశ్వసృజో ధర్మో మహానవ్యక్తమేవ చ । ఉత్తమాం సాత్త్వికీమేతాం గతిమాహుర్మనీషిణః’ (మను. ౧౨ । ౫౦) ఇతి ॥