విశ్వరూపం హరిణం జాతవేదసం పరాయణం జ్యోతిరేకం తపన్తమ్ ।
సహస్రరశ్మిః శతధా వర్తమానః ప్రాణః ప్రజానాముదయత్యేష సూర్యః ॥ ౮ ॥
విశ్వరూపం సర్వరూపం హరిణం రశ్మివన్తం జాతవేదసం జాతప్రజ్ఞానం పరాయణం సర్వప్రాణాశ్రయం జ్యోతిః సర్వప్రాణినాం చక్షుర్భూతమ్ ఎకమ్ అద్వితీయం తపన్తం తాపక్రియాం కుర్వాణం స్వాత్మానం సూర్యం విజ్ఞాతవన్తో బ్రహ్మవిదః । కోఽసౌ యం విజ్ఞాతవన్తః ? సహస్రరశ్మిః అనేకరశ్మిః శతధా అనేకధా ప్రాణిభేదేన వర్తమానః ప్రాణః ప్రజానామ్ ఉదయతి ఎషః సూర్యః ॥