విఘ్నేశ్వరం విఘ్నశాన్త్యై వాణీం వాచః ప్రవృత్తయే ।
గురూన్గూఢార్థభానాయ ప్రణమామి నిరన్తరమ్ ॥ ౧ ॥
జగన్మఙ్గలరూపాయ సృష్టిస్థిత్యన్తకారిణే ।
నమో లక్ష్మీసమేతాయ కృష్ణాయ పరమాత్మనే ॥ ౨ ॥
పరిపూర్ణం నిత్యశుద్ధం నిర్విశేషం స్వయమ్ప్రభమ్ ।
సత్యానన్దస్వరూపం యత్తదహం బ్రహ్మ నిర్భయమ్ ॥ ౩ ॥
ఆచార్యస్య ప్రసాదేన పూర్వపుణ్యైకజన్మనా ।
తైత్తిరీయకభాష్యస్య వ్యాఖ్యాం కుర్వేఽతిభక్తితః ॥ ౪ ॥
తైత్తిరీయకోపనిషదం వ్యాచిఖ్యాసుర్భగవాన్భాష్యకారః తత్ప్రతిపాద్యం బ్రహ్మ జగజ్జన్మాదికారణత్వేన తటస్థలక్షణేన సామాన్యేనోపలక్షితం సత్యజ్ఞానాదినా స్వరూపలక్షణేన విశేషతో నిశ్చితం నమస్కరోతి —
యస్మాజ్జాతమితి ।
జ్ఞానాత్మన ఇతి స్వరూపలక్షణం సూచితమ్ ॥ ౧ ॥