‘ಸಹ ನಾವವತು’ ಇತಿ ಶಾಂತಿಂ ಪ್ರತೀಕಗ್ರಹಣಪೂರ್ವಕಂ ವ್ಯಾಚಷ್ಟೇ —
ಸಹ ನಾವವತ್ವಿತ್ಯಾದಿನಾ ।
ಗುರೋಃ ಕೃತಾರ್ಥತ್ವಾಚ್ಛಿಷ್ಯ ಏವ ಗುರೋಃ ಸ್ವಸ್ಯ ಚ ಕ್ಷೇಮಂ ಪ್ರಾರ್ಥಯತ ಇತ್ಯಾಹ —
ರಕ್ಷತ್ವಿತಿ ।
ಬ್ರಹ್ಮೇತಿ ಶೇಷಃ ।
ಭೋಜಯತ್ವಿತಿ ।
ಪಾಲಯತ್ವಿತ್ಯರ್ಥಃ । ಯಥಾ ಗುರುರ್ನಿರಾಲಸ್ಯ ಉಪದಿಶತಿ ಯಥಾ ಚಾಹಮುಪದಿಷ್ಟಮರ್ಥಮಪ್ರತಿಪತ್ತಿವಿಪ್ರತಿಪತ್ತ್ಯಾದಿರಹಿತೋ ಗೃಹ್ಣಾಮಿ ತಥಾ ಪಾಲಯತ್ವಿತಿ ಭಾವಃ ।
ವಿದ್ಯಾನಿಮಿತ್ತಮಿತಿ ।
ಮಮ ವಿದ್ಯೋದಯಂ ಪ್ರತಿ ನಿಮಿತ್ತತಯಾ ಯದಾವಯೋಃ ಸಾಮರ್ಥ್ಯಮಪೇಕ್ಷಿತಮೂಹಾಪೋಹಾದಿಲಕ್ಷಣಂ ತತ್ಸಹಿತಾವೇವ ನಿರ್ವರ್ತಯಾವಹೈ ಇತ್ಯರ್ಥಃ ।
ಅಧೀತಮಿತಿ ।
ಆವಯೋಃ ಸಂಬಂಧಿ ಯದಧೀತಮುಪನಿಷದ್ಗ್ರಂಥಜಾತಂ ತತ್ತೇಜಸ್ವ್ಯಸ್ತ್ವಿತಿ ಯೋಜನಾ ।
ಅಧೀತಸ್ಯ ತೇಜಸ್ವಿತ್ವಂ ಸೌಷ್ಠವಮಿತ್ಯಾಹ —
ಸ್ವಧೀತಮಿತಿ ।
ಅಪೇಕ್ಷಿತಬ್ರಹ್ಮವಿದ್ಯೋಪಯೋಗಿತ್ವೇನ ತದೇವ ಸೌಷ್ಠವಂ ನಿರೂಪಯತಿ —
ಅರ್ಥಜ್ಞಾನೇತಿ ।
ನನು ಶಿಷ್ಯಾಚಾರ್ಯಯೋರ್ದ್ವೇಷೋ ನ ಪ್ರಸಜ್ಯತೇ ಪರಸ್ಪರಮತ್ಯಂತಹಿತೈಷಿತ್ವಾದಿತ್ಯಾಶಂಕ್ಯಾಹ —
ವಿದ್ಯೇತಿ ।
ವಿದ್ಯಾಗ್ರಹಣಂ ನಿಮಿತ್ತೀಕೃತ್ಯ ಕದಾಚಿದ್ವೈಮನಸ್ಯರೂಪೋ ದ್ವೇಷೋ ಪ್ರಸಜ್ಯತ ಇತ್ಯರ್ಥಃ ।
ತಸ್ಯಾಪಿ ಸ್ವಾರಸಿಕತ್ವಂ ವ್ಯಾವರ್ತಯತಿ —
ಪ್ರಮಾದೇತಿ ।
ಅನ್ಯಕೃತದುರ್ಬೋಧನಾದಿನಾ ಶಿಷ್ಯಸ್ಯಾಚಾರ್ಯವಿಷಯೇಽನಾದರರೂಪೋಽಪರಾಧೋ ಭವತಿ, ತಥಾ ಆಚಾರ್ಯಸ್ಯಾಪಿ ಶಿಷ್ಯವಿಷಯೇ ತಾದೃಗ್ವಿಧ ಏವಾಪರಾಧೋ ಭವತಿ, ಇದಂ ಚ ಲೋಕೇ ಪ್ರಸಿದ್ಧಮಿತಿ ಭಾವಃ । ಶಿಷ್ಯೇಣ ತಾವತ್ಸ್ವವಿಷಯೇ ಆಚಾರ್ಯಕರ್ತೃಕದ್ವೇಷೋಽವಶ್ಯಂ ಪರಿಹರ್ತವ್ಯಃ, ಇತರಥಾ ಅವಿದ್ಯಾನಿವೃತ್ತಿಪರ್ಯಂತವಿದ್ಯೋದಯಾಸಂಭವಾತ್ ; ತದುಕ್ತಂ ವಾರ್ತ್ತಿಕೇ - ‘ಸ್ಯಾಜ್ಜ್ಞಾನಂ ಫಲವದ್ಯಸ್ಮಾಚ್ಛಾಂತಾಂತಃಕರಣೇ ಗುರೌ’ ಇತಿ ; ತಥಾ ಸ್ವಸ್ಯಾಚಾರ್ಯವಿಷಯಕದ್ವೇಷೋಽಪಿ ಸಮ್ಯಕ್ಪರಿಹರ್ತವ್ಯಃ, ತಸ್ಯ ತದ್ಭಕ್ತಿವಿಘಟಕತ್ವೇನ ಭಕ್ತಿಹೀನಸ್ಯ ತಾದೃಶವಿದ್ಯೋದಯಾಸಂಭವಾತ್ । ತಥಾ ಚ ಶ್ರುತಿಃ - ‘ಯಸ್ಯ ದೇವೇ ಪರಾ ಭಕ್ತಿರ್ಯಥಾ ದೇವೇ ತಥಾ ಗುರೌ । ತಸ್ಯೈತೇ ಕಥಿತಾ ಹ್ಯರ್ಥಾಃ ಪ್ರಕಾಶಂತೇ ಮಹಾತ್ಮನಃ’ ಇತೀತಿ ಭಾವಃ ।
ಉಕ್ತಾರ್ಥಮಿತಿ ।
ತ್ರಿರ್ವಚನಮಾಧ್ಯಾತ್ಮಿಕಾಧಿಭೌತಿಕಾಧಿದೈವಿಕಾನಾಂ ವಿದ್ಯಾಪ್ರಾಪ್ತ್ಯುಪಸರ್ಗಾಣಾಂ ಪ್ರಶಮನಾರ್ಥಮಿತಿ ಗ್ರಂಥೇನೇತಿ ಶೇಷಃ ।
ಸಹ ನಾವವತ್ವಿತಿ ಶಾಂತೇರ್ವಕ್ಷ್ಯಮಾಣವಿದ್ಯಾಶೇಷತ್ವಂ ನಿರ್ವಿವಾದಮಿತ್ಯಾಶಯೇನಾಹ —
ವಕ್ಷ್ಯಮಾಣೇತಿ ।
‘ಶ್ರವಣಾಯಾಪಿ ಬಹುಭಿರ್ಯೋ ನ ಲಭ್ಯಃ ಶೃಣ್ವಂತೋಽಪಿ ಬಹವೋ ಯಂ ನ ವಿದ್ಯುಃ’ ಇತ್ಯಾದಿವಚನೈರಾತ್ಮವಿದ್ಯಾಪ್ರಾಪ್ತೌ ವಿಘ್ನಬಾಹುಲ್ಯಾವಗಮಾತ್ತನ್ನಿವೃತ್ತಿರವಶ್ಯಂ ಪ್ರಾರ್ಥನೀಯೇತ್ಯಾಹ —
ಅವಿಘ್ನೇನ ಹೀತಿ ।
ಇತರಥಾ ತತ್ಪ್ರಾಪ್ತ್ಯಭಾವಃ ಪ್ರಸಿದ್ಧ ಇತಿ ಹಿ-ಶಬ್ದಾರ್ಥಃ ।
ನನು ಮುಮುಕ್ಷುಣಾ ಆತ್ಮವಿದ್ಯಾಪ್ರಾಪ್ತಿಃ ಕಿಮರ್ಥಮಾಶಾಸ್ಯತೇ ? ತತ್ರಾಹ —
ತನ್ಮೂಲಂ ಹೀತಿ ।
ಪ್ರಕೃಷ್ಟಶ್ರೇಯಸೋ ಮೋಕ್ಷಸ್ಯಾತ್ಮವಿದ್ಯಾಮೂಲಕತ್ವೇ ‘ತರತಿ ಶೋಕಮಾತ್ಮವಿತ್’ ಇತ್ಯಾದಿಶ್ರುತಿಪ್ರಸಿದ್ಧಿಸೂಚನಾರ್ಥೋ ಹಿ-ಶಬ್ದಃ ॥