ವೃತ್ತಾನುವಾದಪೂರ್ವಕಮಾನಂದವಲ್ಲ್ಯಾಸ್ತಾತ್ಪರ್ಯಮಾಹ –

ಸಂಹಿತಾದೀತ್ಯಾದಿನಾ ।

­ವಕ್ಷ್ಯಮಾಣವಿದ್ಯಾವೈಲಕ್ಷಣ್ಯಾರ್ಥಮಾಹ –

ಕರ್ಮಭಿರವಿರುದ್ಧಾನೀತಿ ।

ಕರ್ಮಭಿರವಿರುದ್ಧಮೇವಾನ್ಯದಪ್ಯುಪಾಸನಮುಕ್ತಮಿತ್ಯಾಹ –

ಅನಂತರಂ ಚೇತಿ ।

ನನು ಕರ್ಮಸಮುಚ್ಚಿತೇನ ವ್ಯಾಹೃತಿಶರೀರಬ್ರಹ್ಮೋಪಾಸನೇನ ಸ್ವಾರಾಜ್ಯಪ್ರಾಪಕೇಣೈವ ಸಬೀಜಸ್ಯ ಸಂಸಾರಸ್ಯ ನಿವೃತ್ತಿಸಂಭವಾತ್ಕಿಂ ನಿರುಪಾಧಿಕಬ್ರಹ್ಮವಿದ್ಯಾರಂಭೇಣೇತ್ಯಾಶಂಕ್ಯಾಹ –

ನ ಚೈತಾವತೇತಿ ।

ಕರ್ಮಸಮುಚ್ಚಿತೇನಾಪಿ ಸೋಪಾಧಿಕಾತ್ಮದರ್ಶನೇನೇತ್ಯರ್ಥಃ ।

ಅತ ಇತಿ ।

ಸೋಪಾಧಿಕಾತ್ಮದರ್ಶನಸ್ಯಾಧಿಷ್ಠಾನಯಾಥಾತ್ಮ್ಯದರ್ಶನರೂಪತ್ವಾಭಾವೇನಾಶೇಷಸಂಸಾರಬೀಜೋಪಮರ್ದನೇ ಸಾಮರ್ಥ್ಯರಹಿತತ್ವಾದಿತ್ಯರ್ಥಃ ।