వైతథ్యం సర్వభావానాం స్వప్న ఆహుర్మనీషిణః ।
అన్తఃస్థానాత్తు భావానాం సంవృతత్వేన హేతునా ॥ ౧ ॥

అదీర్ఘత్వాచ్చ కాలస్య గత్వా దేహాన్న పశ్యతి ।
ప్రతిబుద్ధశ్చ వై సర్వస్తస్మిన్దేశే న విద్యతే ॥ ౨ ॥

అభావశ్చ రథాదీనాం శ్రూయతే న్యాయపూర్వకమ్ ।
వైతథ్యం తేన వై ప్రాప్తం స్వప్న ఆహుః ప్రకాశితమ్ ॥ ౩ ॥

అన్తఃస్థానాత్తు భేదానాం తస్మాజ్జాగరితే స్మృతమ్ ।
యథా తత్ర తథా స్వప్నే సంవృతత్వేన భిద్యతే ॥ ౪ ॥

స్వప్నజాగరితే స్థానే హ్యేకమాహుర్మనీషిణః ।
భేదానాం హి సమత్వేన ప్రసిద్ధేనైవ హేతునా ॥ ౫ ॥

ఆదావన్తే చ యన్నాస్తి వర్తమానేఽపి తత్తథా ।
వితథైః సదృశాః సన్తోఽవితథా ఇవ లక్షితాః ॥ ౬ ॥

సప్రయోజనతా తేషాం స్వప్నే విప్రతిపద్యతే ।
తస్మాదాద్యన్తవత్త్వేన మిథ్యైవ ఖలు తే స్మృతాః ॥ ౭ ॥

అపూర్వం స్థానిధర్మో హి యథా స్వర్గనివాసినామ్ ।
తానయం ప్రేక్షతే గత్వా యథైవేహ సుశిక్షితః ॥ ౮ ॥

స్వప్నవృత్తావపి త్వన్తశ్చేతసా కల్పితం త్వసత్ ।
బహిశ్చేతో గృహీతం సద్దృష్టం వైతథ్యమేతయోః ॥ ౯ ॥

జాగ్రద్వృత్తావపి త్వన్తశ్చేతసా కల్పితం త్వసత్ ।
బహిశ్చేతోగృహీతం సద్యుక్తం వైతథ్యమేతయోః ॥ ౧౦ ॥

ఉభయోరపి వైతథ్యం భేదానాం స్థానయోర్యది ।
క ఎతాన్బుధ్యతే భేదాన్కో వై తేషాం వికల్పకః ॥ ౧౧ ॥

కల్పయత్యాత్మనాత్మానమాత్మా దేవః స్వమాయయా ।
స ఎవ బుధ్యతే భేదానితి వేదాన్తనిశ్చయః ॥ ౧౨ ॥

వికరోత్యపరాన్భావానన్తశ్చిత్తే వ్యవస్థితాన్ ।
నియతాంశ్చ బహిశ్చిత్త ఎవం కల్పయతే ప్రభుః ॥ ౧౩ ॥

చిత్తకాలా హి యేఽన్తస్తు ద్వయకాలాశ్చ యే బహిః ।
కల్పితా ఎవ తే సర్వే విశేషో నాన్యహేతుకః ॥ ౧౪ ॥

అవ్యక్తా ఎవ యేఽన్తస్తు స్ఫుటా ఎవ చ యే బహిః ।
కల్పితా ఎవ తే సర్వే విశేషస్త్విన్ద్రియాన్తరే ॥ ౧౫ ॥

జీవం కల్పయతే పూర్వం తతో భావాన్పృథగ్విధాన్ ।
బాహ్యానాధ్యాత్మికాంశ్చైవ యథావిద్యస్తథాస్మృతిః ॥ ౧౬ ॥

అనిశ్చితా యథా రజ్జురన్ధకారే వికల్పితా ।
సర్పధారాదిభిర్భావైస్తద్వదాత్మా వికల్పితః ॥ ౧౭ ॥

నిశ్చితాయాం యథా రజ్జ్వాం వికల్పో వినివర్తతే ।
రజ్జురేవేతి చాద్వైతం తద్వదాత్మవినిశ్చయః ॥ ౧౮ ॥

ప్రాణాదిభిరనన్తైస్తు భావైరేతైర్వికల్పితః ।
మాయైషా తస్య దేవస్య యయాయం మోహితః స్వయమ్ ॥ ౧౯ ॥

సృష్టిరితి సృష్టివిదో లయ ఇతి చ తద్విదః ।
స్థితిరితి స్థితివిదః సర్వే చేహ తు సర్వదా ॥ ౨౮ ॥

యం భావం దర్శయేద్యస్య తం భావం స తు పశ్యతి ।
తం చావతి స భూత్వాసౌ తద్గ్రహః సముపైతి తమ్ ॥ ౨౯ ॥

ఎతైరేషోఽపృథగ్భావైః పృథగేవేతి లక్షితః ।
ఎవం యో వేద తత్త్వేన కల్పయేత్సోఽవిశఙ్కితః ॥ ౩౦ ॥

స్వప్నమాయే యథా దృష్టే గన్ధర్వనగరం యథా ।
తథా విశ్వమిదం దృష్టం వేదాన్తేషు విచక్షణైః ॥ ౩౧ ॥

న నిరోధో న చోత్పత్తిర్న బద్ధో న చ సాధకః ।
న ముముక్షుర్న వై ముక్త ఇత్యేషా పరమార్థతా ॥ ౩౨ ॥

భావైరసద్భిరేవాయమద్వయేన చ కల్పితః ।
భావా అప్యద్వయేనైవ తస్మాదద్వయతా శివా ॥ ౩౩ ॥

నాత్మభావేన నానేదం న స్వేనాపి కథఞ్చన ।
న పృథఙ్ నాపృథక్కిఞ్చిదితి తత్త్వవిదో విదుః ॥ ౩౪ ॥

వీతరాగభయక్రోధైర్మునిభిర్వేదపారగైః ।
నిర్వికల్పో హ్యయం దృష్టః ప్రపఞ్చోపశమోఽద్వయః ॥ ౩౫ ॥

తస్మాదేవం విదిత్వైనమద్వైతే యోజయేత్స్మృతిమ్ ।
అద్వైతం సమనుప్రాప్య జడవల్లోకమాచరేత్ ॥ ౩౬ ॥

నిఃస్తుతిర్నిర్నమస్కారో నిఃస్వధాకార ఎవ చ ।
చలాచలనికేతశ్చ యతిర్యాదృచ్ఛికో భవేత్ ॥ ౩౭ ॥

తత్త్వమాధ్యాత్మికం దృష్ట్వా తత్త్వం దృష్ట్వా తు బాహ్యతః ।
తత్త్వీభూతస్తదారామస్తత్త్వాదప్రచ్యుతో భవేత్ ॥ ౩౮ ॥