సర్వప్రాణికర్మఫలోపాదానాధిష్ఠానభూతాంశ్చతురో లోకాన్సృష్ట్వా సః ఈశ్వరః పునరేవ ఈక్షత — ఇమే ను తు అమ్భఃప్రభృతయః మయా సృష్టా లోకాః పరిపాలయితృవర్జితా వినశ్యేయుః ; తస్మాదేషాం రక్షణార్థం లోకపాలాన్ లోకానాం పాలయితౄన్ ను సృజై సృజేఽహమ్ ఇతి । ఎవమీక్షిత్వా సః అద్భ్య ఎవ అప్ప్రధానేభ్య ఎవ పఞ్చభూతేభ్యః, యేభ్యోఽమ్భఃప్రభృతీన్సృష్టవాన్ , తేభ్య ఎవేత్యర్థః, పురుషం పురుషాకారం శిరఃపాణ్యాదిమన్తం సముద్ధృత్య అద్భ్యః సముపాదాయ, మృత్పిణ్డమివ కులాలః పృథివ్యాః, అమూర్ఛయత్ మూర్ఛితవాన్ , సమ్పిణ్డితవాన్స్వావయవసంయోజనేనేత్యర్థః ॥