అభ్యతపదితి ।
ఎతేభ్యో భూతేభ్యో మనుష్యాదీనామన్నభూతా వ్రీహ్యాదయో జాయన్తాం మార్జారాదీనామన్నభూతాని మూషకాదీని జాయన్తామితి పర్యాలోచనం సఙ్కల్పం కృతవానిత్యర్థః ।
మూర్తిశబ్దేన కరచరణాదిమతోఽభిధానే వ్రీహ్యాదేరగ్రహణం స్యాదత ఆహ –
ఘనరూపమితి ।
కఠినమిత్యర్థః ।
నన్వమూర్తానామపి వాయుచన్ద్రకిరణాదీనాం సర్పాదీన్ప్రత్యన్నత్వమస్తీతి తత్సఙ్గ్రహార్థమాహ –
ధారణసమర్థం చేతి ।
శరీరధారణసమర్థమిత్యర్థః ।
చరేతి ।
చరం మూషకాద్యచరం వ్రీహ్యాదీత్యర్థః । యా వై సా మూర్తిరజాయతాన్నం వై తదితి పూర్వేణాన్వయః ।
తచ్ఛబ్దార్థమాహ –
మూర్తిరూపమితి ॥౨॥