తస్యేదన్ద్రనామప్రసిద్ధ్యాఽపి తస్య జ్ఞానస్యాపరోక్షత్వమితి వక్తుం తస్మాదిదన్ద్ర ఇతి వాక్యం తద్వ్యాచష్టే –

తస్మాదితి ।

తస్మాత్సర్వాన్తరం బ్రహ్మేదం నిత్యమేవాపరోక్షేణ ప్రత్యగాత్మేత్యేవమపశ్యదిత్యన్వయః ।

కథమిదన్ద్రనామత్వమత ఆహ –

ఇదన్ద్రో హ వా ఇతి ।

నన్విన్ద్రో మాయాభిరిత్యాదావిన్ద్ర ఇతి ప్రసిద్ధో నత్విదన్ద్ర ఇత్యత ఆహ –

తమేవమితి ।

ఇదన్ద్రస్యైవ సతః పరోక్షత్వార్థమక్షరలోపేనేన్ద్ర ఇత్యాహురిత్యర్థః ।

పరోక్షోక్తేః ప్రయోజనమాహ –

పూజ్యేతి ।

పూజ్యానాం పరోక్షతయైవ నామ వక్తవ్యమిత్యత్ర ప్రమాణమాహ –

తథా హీతి ।

దేవా ఇతి ।

పూజ్యా ఇత్యర్థః । అత ఎవాఽఽచార్యా ఉపాధ్యాయా ఇత్యుక్తామేవ ప్రీతిం కుర్వన్తి లోకే న తు విష్ణుమిత్రాదినామగ్రహణ ఇతి భావః । నామ్నః పరోక్షత్వం నామ యథార్థనామ్నో రూపాన్తరకరణేన స్వరూపాచ్ఛాదనమితి జ్ఞేయమ్ ॥౧౪॥