ஜ்யோதிர்த³ர்ஶநாத் ।
அத்ர ஹி ஜ்யோதி:ஶப்³த³ஸ்ய தேஜஸி முக்²யத்வாத் , ப்³ரஹ்மணி ஜக⁴ந்யத்வாத் , ப்ரகரணாச்ச ஶ்ருதேர்ப³லீயஸ்த்வாத் , பூர்வவச்ச்²ருதிஸங்கோசஸ்ய சாத்ராபா⁴வாத் , ப்ரத்யுத ப்³ரஹ்மஜ்யோதி:பக்ஷே க்த்வாஶ்ருதே: பூர்வகாலார்தா²யா: பீட³நப்ரஸங்கா³த் , ஸமுத்தா²நஶ்ருதேஶ்ச தேஜ ஏவ ஜ்யோதி: । ததா²ஹி - ஸமுத்தா²நமுத்³க³மநமுச்யதே, ந து விவேகவிஜ்ஞாநம் । உத்³க³மநம் ச தேஜ:பக்ஷே(அ)ர்சிராதி³மார்கே³ணோபபத்³யதே । ஆதி³த்யஶ்சார்சிராத்³யபேக்ஷயா பரம் ஜ்யோதிர்ப⁴வதீதி தது³பஸம்பத்³ய தஸ்ய ஸமீபே பூ⁴த்வா ஸ்வேந ரூபேணாபி⁴நிஷ்பத்³யதே, கார்யப்³ரஹ்மலோகப்ராப்தௌ க்ரமேண முச்யதே । ப்³ரஹ்மஜ்யோதி:பக்ஷே து ப்³ரஹ்ம பூ⁴த்வா கா பரா ஸ்வரூபநிஷ்பத்தி: । நச தே³ஹாதி³விவிக்தப்³ரஹ்மஸ்வரூபஸாக்ஷாத்காரோ வ்ருத்திரூபோ(அ)பி⁴நிஷ்பத்தி: । ஸா ஹி ப்³ரஹ்மபூ⁴யாத்ப்ராசீநா ந து பராசீநா । ஸேயமுபஸம்பத்³யேதி க்த்வாஶ்ருதே: பீடா³ । தஸ்மாத்திஸ்ருபி⁴: ஶ்ருதிபி⁴: ப்ரகரணபா³த⁴நாத்தேஜ ஏவாத்ர ஜ்யோதிரிதி ப்ராப்தம் ।