ஆசார்யதே³ஶீயமதமாஹ -
அந்யே த்விதி ।
ஏதத்³தூ³ஷயதி -
தைஸ்த்விதி ।
ப்ரகரணபாரிஶேஷ்யயோருப⁴யத்ர துல்யத்வாந்நைகக்³ரஹணநியமஹேதுரஸ்தி ।
ஶங்கதே -
ஆம்நாதஸ்யார்த²மிதி ।
அவ்யக்தபத³மேவ ஸ்தூ²லஶரீரவ்யாவ்ருத்திஹேதுர்வ்யக்தத்வாத்தஸ்யேதி ஶங்கார்த²: ।
நிராகரோதி -
ந ।
ஏகவாக்யதாதீ⁴நத்வாதி³தி ।
ப்ரக்ருதஹாந்யப்ரக்ருதப்ரக்ரியாப்ரஸங்கே³நைகவாக்யத்வே ஸம்ப⁴வதி ந வாக்யபே⁴தோ³ யுஜ்யதே । ந சாகாங்க்ஷாம் விநைகவாக்யத்வம் , உப⁴யம் ச ப்ரக்ருதமித்யுப⁴யம் க்³ராஹ்யத்வேநேஹாகாங்க்ஷிதமித்யேகாபி⁴தா⁴யகமபி பத³ம் ஶரீரத்³வயபரம் । நச முக்²யயா வ்ருத்த்யா(அ)தத்பரமித்யௌபசாரிகம் ந ப⁴வதி । யதோ²பஹந்த்ருமாத்ரநிராகரணாகாங்க்ஷாயாம் காகபத³ம் ப்ரயுஜ்யமாநம் ஶ்வாதி³ஸர்வஹந்த்ருபரம் விஜ்ஞாயதே । யதா²ஹு: “காகேப்⁴யோ ரக்ஷ்யதாமந்நமிதி பா³லே(அ)பி நோதி³த: । உபகா⁴தப்ரதா⁴நத்வாந்ந ஶ்வாதி³ப்⁴யோ ந ரக்ஷதி ॥”(மீமாம்ஸாகாரிகா) இதி ।
நநு ந ஶரீரத்³வயஸ்யாத்ராகாங்க்ஷா । கிந்து து³:ஶோத⁴த்வாத்ஸூக்ஷ்மஸ்யைவ ஶரீரஸ்ய, நது ஷாட்கௌஶிகஸ்ய ஸ்தூ²லஸ்ய । ஏதத்³தி⁴ த்³ருஷ்டபீ³ப⁴த்ஸதயா ஸுகரம் வைராக்³யவிஷயத்வேந ஶோத⁴யிதுமித்யத ஆஹ -
ந சைவம் மந்தவ்யமிதி ।
விஷ்ணோ: பரமம் பத³மவக³மயிதும் பரம் பரமத்ர ப்ரதிபாத்³யத்வேந ப்ரஸ்துதம் ந து வைராக்³யாய ஶோத⁴நமித்யர்த²: ।
அலம் வா விவாதே³ந, ப⁴வது ஸூக்ஷ்மமேவ ஶரீரம் பரிஶோத்⁴யம், ததா²பி ந ஸாங்க்²யாபி⁴மதமத்ர ப்ரதா⁴நம் பரமித்யப்⁴யுபேத்யாஹ -
ஸர்வதா²பி த்விதி ॥ 3 ॥