ब्रह्मणि जीवगतं मनोमयत्वादीष्टं चेद्ब्रह्मगतमपि सत्यसङ्कल्पत्वाद्यभेदाज्जीवेऽस्तु, नेत्याह —

अनुपपत्तेस्त्विति ।

सूत्रं व्याख्यातुं सङ्गतिमाह —

पूर्वेणेति ।

आरोप्यरूपेण विषयस्यैव रूपित्वं न विपरीतं, नहि रज्ज्वा रूपेण सर्पो रूपवानित्यर्थः ।

अवधारणमेव स्फोरयन्नेत्यादि विभजते —

ब्रह्मेति ।

सर्वात्मत्वादिरुक्तो न्यायः ।

अनुपपत्तेरिति व्याचष्टे —

यदिति ।

वागेव वाकः सोऽस्यास्तीति वाकी न वाक्यवाकी । वागादिसर्वेन्द्रियरहित इत्यर्थः । आप्तकामत्वान्न कुत्रचिदादरोऽस्तीत्यनादरः ।

शारीरत्वमीश्वरेऽपि व्यापिनि स्यादिति शङ्कते —

नन्विति ।

अयोगव्यवच्छेदमङ्गीकृत्यान्ययोगव्यवच्छेदाभावान्नेत्याह —

सत्यमिति ।

अन्ययोगाव्यवच्छेदे हेतुः —

ज्यायानिति ।

जीवे वा कथं विशिष्टं शारीरत्वं, तत्राह —

जीवस्त्विति ॥ ३ ॥