अनिषेध्यत्वेन वस्तुसत्यं ब्रह्मोक्त्वा तस्याग्राह्यत्वेनासत्त्वमाशङ्क्य प्रत्याह -

तदव्यक्तमिति ।

सूत्रव्यावर्त्यमाह -

यत्तदिति ।

आत्मनि गृह्यमाणे तदभिन्नब्रह्मापि ग्राह्यमिति वापाद्यते भावत्वे घटवत्प्रत्यक्षग्राह्यता तस्या स्यादिति वा । नाद्यः । प्रत्यगभिन्नत्वेऽप्यविद्यावृतत्वात्तद्ग्रहेऽपि तदग्रहसिद्धेरित्याह -

उच्यत इति ।

न द्वितीय इत्याह -

तदिति ।

कथमिन्द्रियाग्राह्यत्वं ब्रह्मणः सिद्धं, तत्राह -

आह हीति ।

अन्यैर्देवैरिन्द्रियान्तरैरिति यावत् ।

श्रुत्युक्तिपरत्वेन सूत्रावयवं व्याख्याय विधान्तरेण व्याचष्टे -

स्मृतिरिति ॥ २३ ॥