किञ्च जनकादीनां विद्यया सह कर्मा चरणदर्शनान्न केवलैव विद्या मोक्षहेतुरतः महानुष्ठानं विद्यायाः स्वातन्त्र्याभावेन कर्माङ्गत्वे लिङ्गमित्याह -
आचारेति ।
सूत्रं व्याचष्टे -
जनको हेति ।
विदेहानामधिपतिर्जनको नाम राजा बहुदक्षिणसंज्ञेन यज्ञेनाश्वमेधेन वा बहुदक्षिणायुक्तेन पुरा कदाचिदीजे यागं कृत्वान् ।
कैकेयस्य राज्ञो ब्रह्मविदो वाक्यमाह -
यक्ष्यमाण इति ।
विद्यार्थिनः समागतान्प्राचीनशालादीन्भगवन्त इति सम्बोध्याहं यक्ष्यमाणोऽस्मि ततश्च कतिचिद्दिनान्याध्वमिति राजोक्तवानित्यर्थः ।
उक्तवाक्यानि विद्यार्थानि न कर्मार्थानीत्याशङ्क्याह -
अन्येति ।
इतश्च ब्रह्मविदामस्ति कर्मसङ्गतिरित्याह -
तथेति ।
आदिपदेन व्यासयाज्ञवल्क्यादिसङ्ग्रहः । द्वितीयेन भार्यानु शासनादि गृह्यते ।
कर्म कृतं विद्वद्भिरेव कैश्चिदित्येतावता विद्याशक्तेरपह्नवायोगात्केबलैव सा मुक्तिहेतुरित्याशङ्क्याह -
केवलादिति ।
अल्पायासमुपायं हित्वा न कोऽपि महायासं तमाद्रियत इत्यत्र लौकिकन्यायमाह -
अर्के चेदिति ।
समीपवचनोऽर्कशब्दः ॥ ३ ॥