उक्तोत्क्रान्तेरपरविद्यान्वयमन्वाचष्टे -

समाना चेति ।

उत्क्रान्तिर्विषयस्तत्र ‘विद्ययाऽमृतमश्नुते’ इति श्रुतेरस्य सोम्य पुरुषस्येत्यविशेषश्रुतेश्च संशयमाह -

सेयमिति ।

विशयानानां सन्दिहानानामित्यर्थः । श्रौतापरविद्यासु फलप्राप्त्युपयोगित्वेनोत्क्रान्त्यन्वयोक्त्या पादादिसङ्गतिः । पूर्वपक्षे विदुषो देहादनुत्क्रान्तस्य मोक्षसिद्धिः ।

सिद्धान्ते तस्यापीतरवत्तस्मादुत्क्रान्तेरप्रतिबन्धेन तत्सिद्धिरित्यङ्गीकृत्य विद्ययामृतमश्नुत इति सगुणोपासकानामप्यमृतत्वफलावगमात्सगुणब्रह्मविदो नैवोत्क्रान्तिरिति पूर्वपक्षयति -

विशेषेति ।

अविदुष एवोत्क्रान्तिरिति विशेषवत्त्वमेव दर्शयति -

भूतेति ।

पूर्वपक्षमाक्षिपति -

नन्विति ।

वस्तुतत्त्वप्रतिपादनाय लोकसिद्धधर्माणामनूद्यमानन्त्वान्न प्रकरणं विद्वद्विषयमिति समाधत्ते -

नेत्यादिना ।

दृष्टान्तं विवृणोति -

यथेति ।

दार्ष्टान्तिकं विभजते -

एवमिति ।

उत्क्रान्तेर्विद्वद्विषयत्वाभावे हेत्वन्तरमाह -

प्रतिषिद्धेति ।

विशेषवत्त्वमुत्क्रान्तेरुक्तमुपसंहरति -

तस्मादिति ।