ಅಪಾಮರ್ಕತ್ವಶ್ರವಣಾನ್ನಾಗ್ನೇರರ್ಕತ್ವಮಿತಿ ಶಂಕತೇ —
ಕಃ ಪುನರಿತಿ ।
ಪ್ರಕರಣಮಾಶ್ರಿತ್ಯ ತಾಸಾಮರ್ಕತ್ವಮೌಪಚಾರಿಕಮಿತ್ಯುತ್ತರಮಾಹ —
ಉಚ್ಯತ ಇತಿ ।
ತಾಸ್ವಂತರ್ಹಿರಣ್ಮಯಮಂಡಂ ಸಂಬಭೂವೇತಿ ಶ್ರುತಿಮನುಸರನ್ನುಪಚಾರೇ ಹೇತ್ವಂತರಮಾಹ —
ಅಪ್ಸು ಚೇತಿ ।
ಮುಖ್ಯಮರ್ಕತ್ವಮಪಾಂ ವಾರಯತಿ —
ನ ಪುನರಿತಿ ।
ನನು ‘ಶ್ರುತಿಲಿಂಗವಾಕ್ಯಪ್ರಕರಣಸ್ಥಾನಸಮಾಖ್ಯಾನಾಂ ಸಮವಾಯೇ ಪಾರದೌರ್ಬಲ್ಯಮರ್ಥವಿಪ್ರಕರ್ಷಾತ್’ (ಜೈ. ಸೂ. ೩ । ೩ । ೧೪) ಇತಿನ್ಯಾಯಾತ್ಪ್ರಕರಣಾದಾಪೋ ವಾ ಅರ್ಕ ಇತಿ ವಾಕ್ಯಂ ಬಲವದಿತ್ಯಾಶಂಕ್ಯ ವಾಕ್ಯಸಹಕೃತಂ ಪ್ರಕರಣಮೇವ ಕೇವಲವಾಕ್ಯಾದ್ಬಲವದಿತ್ಯಾಶಯವಾನಾಹ —
ವಕ್ಷ್ಯತಿ ಚೇತಿ ।
ಭೂತಾಂತರಸಹಿತಾಸ್ವಪ್ಸು ಕಾರಣಭೂತಾಸು ಪೃಥಿವೀದ್ವಾರಾ ಪಾರ್ಥಿವೋಽಗ್ನಿಃ ಪ್ರತಿಷ್ಠಿತ ಇತ್ಯುಕ್ತಮಿದಾನೀಂ ಪೃಥಿವೀಸರ್ಗಂ ತಾಭ್ಯೋ ದರ್ಶಯತಿ —
ತದಿತ್ಯಾದಿನಾ ।
ಅಪ್ಸು ಭೂತಾಂತರಸಹಿತಾಸೂತ್ಪನ್ನಾಸು ಸತೀಷ್ವಿತಿ ಸಪ್ತಮ್ಯರ್ಥಃ ।
ಶರ ಇವ ಶರ ಇತ್ಯುಕ್ತಮೇವ ವ್ಯಾಚಷ್ಟೇ —
ದಧ್ನ ಇವೇತಿ ।
ಸಂಘಾತೇ ಸಹಕಾರಿಕಾರಣಮಾಹ —
ತೇಜಸೇತಿ ।
ಯತ್ತದಿತಿ ಪದೇ ನಪುಂಸಕತ್ವೇನ ಶ್ರುತೇ ಕಥಂ ತಯೋಃ ಶರಶಬ್ದೇನ ಕಾರಣಸ್ಯೋಚ್ಛೂನತ್ವವಾಚಿನಾ ಪುಂಲ್ಲಿಂಗೇನಾನ್ವಯಸ್ತತ್ರಾಽಽಹ —
ಲಿಂಗವ್ಯತ್ಯಯೇನೇತಿ ।
ಉಕ್ತಾನುಪಪತ್ತಿದ್ಯೋತನಾರ್ಥೋ ವಾಶಬ್ದಃ ।
ವ್ಯತ್ಯಯೇನಾನ್ವಯಮೇವಾಭಿನಯತಿ —
ಯೋಽಪಾಮಿತಿ ।
ವಾಕ್ಯತಾತ್ಪರ್ಯಮಾಹ —
ತಾಭ್ಯ ಇತಿ ।
ಸ್ಥೂಲಪ್ರಪಂಚಾತ್ಮಕವಿರಾಜಃ ಸೂಕ್ಷ್ಮಪ್ರಪಂಚಾತ್ಮಕಸೂತ್ರಾದುತ್ಪತ್ತಿಂ ವಕ್ತುಂ ಪಾತನಿಕಾಮಾಹ —
ತಸ್ಯಾಮಿತಿ ।
ಉಕ್ತೇಽರ್ಥೇ ಲೋಕಪ್ರಸಿದ್ಧಿಮನುಕೂಲಯತಿ —
ಸರ್ವೋ ಹೀತಿ ।
ಇದಾನೀಂ ವಿರಾಡುತ್ಪತ್ತಿಮುಪದಿಶತಿ —
ಕಿಂ ತಸ್ಯೇತ್ಯಾದಿನಾ ।
ಅಗ್ನಿಶಬ್ದಾರ್ಥಂ ಸ್ಫುಟಯತಿ —
ಸೋಽಂಡಸ್ಯೇತಿ ।
ತಸ್ಯ ಪ್ರಥಮಶರೀರಿತ್ವೇ ಮಾನಮಾಹ —
ಸ ವಾ ಇತಿ ॥೨॥