ಉಪಾಸ್ತಿವಿಧೌ ಸಫಲೇ ಸತಿ ಸಮಾಪ್ತಿರೇವ ಬ್ರಾಹ್ಮಣಸ್ಯೋಚಿತಾ ಕಿಮುತ್ತರಗ್ರಂಥೇನೇತ್ಯಾಶಂಕ್ಯ ಪ್ರತೀಕಮಾದಾಯ ತಾತ್ಪರ್ಯಮಾಹ —
ಸೋಽಕಾಮಯತೇತ್ಯಾದಿನಾ ।
ತದೇವಾಶ್ವಮೇಧಸ್ಯಾಶ್ವಮೇಧತ್ವಮಿತ್ಯೇತದಂತಂ ವಾಕ್ಯಮಿದಮಾ ನಿರ್ದಿಶ್ಯತೇ । ಭೂಯೋದಕ್ಷಿಣಾಕತ್ವಾದಶ್ವಮೇಧಸ್ಯ ಭೂಯಸ್ತ್ವಮ್ । ಇತಿಶಬ್ದೋಽಕಾಮಯತೇತ್ಯನೇನ ಸಂಬಧ್ಯತೇ ।
ಕಥಂ ಪುನಸ್ತೇನ ಯಕ್ಷ್ಯಮಾಣಸ್ಯ ಪ್ರಜಾಪತೇರ್ಭೂಯಃಶಬ್ದೋಕ್ತಿಃ । ನ ಹಿ ಸ ಪೂರ್ವಮಶ್ವಮೇಧಮನ್ವತಿಷ್ಠತ್ಕರ್ಮಾನಧಿಕಾರಿತ್ವಾತ್ತತ್ರಾಽಽಹ —
ಜನ್ಮಾಂತರೇತಿ ।
ತದೇವ ಸ್ಪಷ್ಟಯತಿ —
ಸ ಪ್ರಜಾಪತಿರಿತಿ ।
ಅಥಾತೀತೇ ಜನ್ಮನಿ ಯಜಮಾನೋಽಶ್ವಮೇಧಸ್ಯ ಕರ್ತಾಽಭೂತ್ । ಅಧುನಾ ಹಿರಣ್ಯಗರ್ಭೋ ಭೂಯೋ ಯಜೇಯೇತ್ಯಾಹ । ತಥಾ ಚ ಕರ್ತೃಭೇದಾದ್ಭೂಯಃಶಬ್ದಸಾಮಂಜಸ್ಯಮತ ಆಹ —
ಸ ತದ್ಭಾವೇತಿ ।
ಸ ಪ್ರಜಾಪತಿರಶ್ವಮೇಧವಾಸನಾವಿಶಿಷ್ಟೋ ಜ್ಞಾನಕರ್ಮಫಲತ್ವೇನ ಕಲ್ಪಾದೌ ನಿರ್ವೃತ್ತೋ ಭೂಯೋ ಯಜೇಯೇತ್ಯಾಹ ಕರ್ತೃಭೋಕ್ತ್ರೋರೈಕ್ಯೇನ ಸಾಧಕಫಲಾವಸ್ಥಯೋರ್ಯಜಮಾನಸೂತ್ರಯೋರ್ಭೇದಾಭಾವಾದಿತ್ಯರ್ಥಃ ।
ಪ್ರಜಾಪತಿರೀಶ್ವರೋ ನ ತಸ್ಯ ದುಃಖಾತ್ಮಕಕ್ರತ್ವನುಷ್ಠಾನೇಚ್ಛಾ ಯುಕ್ತೇತ್ಯಾಶಂಕ್ಯ ಪ್ರಕೃತಿವಶಾತ್ತದುಪಪತ್ತಿಮಭಿಪ್ರೇತ್ಯಾಽಽಹ —
ಸೋಽಶ್ವಮೇಧೇತಿ ।
ಕಥಮೇತಾವತಾ ವಿವಕ್ಷಿತಾಸ್ತುತಿಃ ಸಿದ್ಧೇತ್ಯಾಶಂಕ್ಯಾಽಽಹ —
ಏವಮಿತಿ ।
ಶ್ರಮಕಾರ್ಯಮಾಹ —
ಸ ತಪ ಇತಿ ।
ಚಕ್ಷುರಾದೀನಾಂ ಯಶಸ್ತ್ವೇ ಹೇತುಮಾಹ —
ಯಶೋಹೇತುತ್ವಾದಿತಿ ।
ತದೇವ ಸಾಧಯತಿ —
ತೇಷು ಹೀತಿ ।
ಪ್ರಾಣಾ ಏವೇತಿ ತಥಾಶಬ್ದಾರ್ಥಃ । ಸತ್ಸು ಹಿ ತೇಷು ಶರೀರೇ ಬಲಂ ಭವತೀತಿ ಪೂರ್ವವದೇವ ಹೇತುರುನ್ನೇಯಃ ।
ಉಕ್ತಮರ್ಥಂ ವ್ಯತಿರೇಕದ್ವಾರಾ ಸ್ಫೋರಯತಿ —
ನ ಹೀತಿ ।
ಪ್ರಾಣಾನಾಂ ಯಶಸ್ತ್ವಂ ವೀರ್ಯತ್ವಂ ಚೋಪಸಂಹೃತ್ಯ ವಾಕ್ಯಾರ್ಥಂ ನಿಗಮಯತಿ —
ತದೇವಮಿತಿ ।
ತತ್ಪ್ರಾಣೇಷ್ವಿತ್ಯಾದಿ ವ್ಯಾಚಷ್ಟೇ —
ತದೇವಮಿತ್ಯಾದಿನಾ ।
ಶರೀರಾನ್ನಿರ್ಗತಸ್ಯ ಪ್ರಜಾಪತೇರ್ಮುಕ್ತತ್ವಮಾಶಂಕ್ಯಾಽಽಹ —
ತಸ್ಯೇತಿ ॥೬॥