ಸಮ್ಯಗ್ಜ್ಞಾನಾಭಾವಾದಾಸಂಗೇ ಸತ್ಯಪಿ ನ ಪುನಸ್ತಸ್ಮಿನ್ಪ್ರವೇಶೋ ಯುಕ್ತಃ ಪರಿತ್ಯಕ್ತಪರಿಗ್ರಹಾಯೋಗಾದಿತಿ ಶಂಕತೇ —
ಸ ತಸ್ಮಿನ್ನಿತಿ ।
ಅಜ್ಞಾನವಶಾತ್ಪರಿತ್ಯಕ್ತಪರಿಗ್ರಹೋಽಪಿ ಸಂಭವತೀತ್ಯಾಹ —
ಉಚ್ಯತ ಇತಿ ।
ವೀತದೇಹಸ್ಯ ಕಾಮನಾಽಯುಕ್ತೇತಿ ಶಂಕತೇ —
ಕಥಮಿತಿ ।
ಸಾಮರ್ಥ್ಯಾತಿಶಯಾದಶರೀರಸ್ಯಾಪಿ ಪ್ರಜಾಪತೇಸ್ತದುಪಪತ್ತಿರಿತಿ ಮನ್ವಾನೋ ಬ್ರೂತೇ —
ಮೇಧ್ಯಮಿತಿ ।
ಕಾಮನಾಫಲಮಾಹ —
ಇತಿ ಪ್ರವಿವೇಶೇತಿ ।
ತಥಾಪಿ ಕಥಂ ಪ್ರಕೃತನಿರುಕ್ತಿಸಿದ್ಧಿರಿತ್ಯಾಶಂಕ್ಯಾಽಽಹ —
ಯಸ್ಮಾದಿತಿ ।
ಯಚ್ಛಬ್ದೋ ಯಸ್ಮಾದಿತಿ ವ್ಯಾಖ್ಯಾತಃ ।
ದೇಹಸ್ಯಾಶ್ವತ್ವೇಽಪಿ ಕಥಂ ಪ್ರಜಾಪತೇಸ್ತಥಾತ್ವಮಿತ್ಯಾಶಂಕ್ಯ ತತ್ತಾದಾತ್ಮ್ಯಾದಿತ್ಯಾಹ —
ತತ ಇತಿ ।
ಅಶ್ವಸ್ಯ ಪ್ರಜಾಪತಿತ್ವೇನ ಸ್ತುತತ್ವಾತ್ತಸ್ಯೋಪಾಸ್ಯತ್ವಂ ಫಲತೀತಿ ಭಾವಃ ।
ತಥಾಪಿ ಕಥಮಶ್ವಮೇಧನಾಮನಿರ್ವಚನಮಿತ್ಯಾಶಂಕ್ಯಾಽಽಹ —
ಯಸ್ಮಾಚ್ಚೇತಿ ।
ಕ್ರತೋಸ್ತದಾತ್ಮಕಸ್ಯ ಪ್ರಜಾಪತೇರಿತಿ ಯಾವತ್ । ದೇಹೋ ಹಿ ಪ್ರಾಣವಿಯೋಗಾದಶ್ವಯತ್ಪುನಸ್ತತ್ಪ್ರವೇಶಾಚ್ಚ ಮೇಧಾರ್ಹೋಽಭೂದತಃ ಸೋಽಶ್ವಮೇಧಸ್ತತ್ತಾದಾತ್ಮ್ಯಾತ್ಪ್ರಜಾಪತಿರಪಿ ತಥೇತ್ಯರ್ಥಃ ।
ನನು ಪ್ರಜಾಪತಿತ್ವೇನಾಶ್ವಮೇಧಸ್ಯ ಸ್ತುತಿರ್ನೋಪಯೋಗಿನೀ, ಅಗ್ನೇರುಪಾಸ್ಯತ್ವೇನ ಪ್ರಸ್ತುತತ್ವಾತ್ಕ್ರತೂಪಾಸನಾಭಾವಾದತ ಆಹ —
ಕ್ರಿಯೇತಿ ।