ನನು ವೇದಾಂತವೇದ್ಯಂ ಬ್ರಹ್ಮೇಷ್ಯತೇ ನ ಚ ತೇಭ್ಯಸ್ತದ್ಧೀಃ ಸಿದ್ಧ್ಯತಿ ತೇಷಾಂ ವಿಧಿವೈಧುರ್ಯೇಣಾಪ್ರಾಮಾಣ್ಯಾತ್ತತ್ಕುತೋ ಬ್ರಹ್ಮಸಿದ್ಧಿರತ ಆಹ —
ಕ್ರಿಯಾರ್ಥೈಶ್ಚೇತಿ ।
ವಿಮತಂ ಸ್ವಾರ್ಥೇ ಪ್ರಮಾಣಮಜ್ಞಾತಜ್ಞಾಪಕತ್ವಾತ್ಸಮ್ಮತವತ್ । ಅತೋ ವೇದಾಂತಶಾಸ್ತ್ರಾದೇವ ಬ್ರಹ್ಮಸಿದ್ಧಿರಿತ್ಯರ್ಥಃ ।
ಸಿದ್ಧಸಾಧ್ಯರ್ಥಭೇದೇನ ವೈಷಮ್ಯಾದವಿಶಿಷ್ಟತ್ವಮನಿಷ್ಟಮಿತ್ಯಾಶಂಕ್ಯೋಕ್ತಂ ವಿವೃಣೋತಿ —
ಯಥಾ ಚೇತಿ ।
ವಿಶಿಷ್ಟತ್ವಂ ಸ್ವರೂಪೋಪಕಾರಿತ್ವಂ ಫಲೋಪಕಾರಿತ್ವಂ ಚ । ಪಂಚಮೋಕ್ತಂ ಪ್ರಕಾರಂ ಪರಾಮ್ರಷ್ಟುಮೇವಮಿತ್ಯಾದಿಷ್ಟಮ್ ।
ಅಲೌಕಿಕತ್ವಂ ಸಾಧಯತಿ —
ಪ್ರತ್ಯಕ್ಷಾದೀತಿ ।
ಕಿಂಚ ವೇದಾಂತಾನಾಮಪ್ರಾಮಾಣ್ಯಂ ಬುದ್ಧ್ಯನುತ್ಪತ್ತೇರ್ವಾ ಸಂಶಯಾದ್ಯುತ್ಪತ್ತೇರ್ವಾ ? ನಾಽಽದ್ಯ ಇತ್ಯಾಹ —
ನ ಚೇತಿ ।
ನ ದ್ವಿತೀಯ ಇತ್ಯಾಹ —
ನ ಚಾನಿಶ್ಚಿತೇತಿ ।
ಕೋಟಿದ್ವಯಾಸ್ಪರ್ಶಿತ್ವಾದಬಾಧಾಚ್ಚೇತ್ಯರ್ಥಃ ।
ಕ್ರಿಯಾರ್ಥೈರ್ವಾಕ್ಯೈರ್ವಿದ್ಯಾರ್ಥಾನಾಂ ವಾಕ್ಯಾನಾಂ ಸಾಧರ್ಮ್ಯಮುಕ್ತಮಾಕ್ಷಿಪತಿ —
ಅನುಷ್ಠೇಯೇತಿ ।
ಸಾಧರ್ಮ್ಯಸ್ಯಾಯುಕ್ತತ್ವಮೇವ ವ್ಯನಕ್ತಿ —
ಕ್ರಿಯಾರ್ಥೈರಿತಿ ।
ವಾಕ್ಯೋತ್ಥಬುದ್ಧೇರ್ಯಥಾರ್ಥತ್ವಾದ್ವಿಧ್ಯಭಾವೇಽಪಿ ವಾಕ್ಯಪ್ರಾಮಾಣ್ಯಮಜ್ಞಾತಜ್ಞಾಪಕತ್ವೇನಾವಿರುದ್ಧಮಿತಿ ಪರಿಹರತಿ —
ನ ಜ್ಞಾನಸ್ಯೇತಿ ।
ಅನುಷ್ಠೇಯನಿಷ್ಠತ್ವಮಂತರೇಣ ಕುತೋ ವಸ್ತುನಿ ಪ್ರಯೋಗಪ್ರತ್ಯಯಯೋಸ್ತಥಾರ್ಥತ್ವಮಿತ್ಯಾಶಂಕ್ಯ ತಯೋರ್ವಿಷಯತಯಾ ತಥಾರ್ಥತ್ವಂ ತದಪೇಕ್ಷಸ್ವಪ್ರಾಮಾಣ್ಯಾರ್ಥತ್ವಂ ವೇತಿ ವಿಕಲ್ಪ್ಯಾಽಽದ್ಯಂ ದೂಷಯತಿ —
ನ ಹೀತಿ ।
ತದುಭಯವಿಷಯಸ್ಯ ಕರ್ತವ್ಯಾರ್ಥಸ್ಯ ತಥಾತ್ವಂ ನ ಕರ್ತವ್ಯತ್ವಾಪೇಕ್ಷಂ ಕಿಂತು ಮಾನಗಮ್ಯತ್ವಾದನ್ಯಥಾ ವಿಪ್ರಲಂಭಕವಿಧಿವಾಕ್ಯೇಽಪಿ ತಥಾತ್ವಾಪತ್ತೇರಿತ್ಯರ್ಥಃ ।
ದ್ವಿತೀಯಂ ಪ್ರತ್ಯಾಹ —
ನ ಚೇತಿ ।
ಬುದ್ಧಿಗ್ರಹಣಂ ಪ್ರಯೋಗೋಪಲಕ್ಷಣಾರ್ಥಮ್ । ಕರ್ತವ್ಯತಾರ್ಥವಿಷಯಪ್ರಯೋಗಾದೇರ್ನಾನುಷ್ಠೇಯವಿಷಯತ್ವಾನ್ಮಾನತ್ವಂ ಕಿಂತು ಪ್ರಮಾಕರಣತ್ವಾತ್ತಜ್ಜನ್ಯತ್ವಾಚ್ಚಾನ್ಯಥೋಕ್ತಾತಿಪ್ರಸಕ್ತಿತಾದವಸ್ಥ್ಯಾದತೋಽನುಷ್ಠೇಯನಿಷ್ಠತ್ವಂ ಮಾನತ್ವೇಽನುಪಯುಕ್ತಮಿತ್ಯರ್ಥಃ ।
ಕುತಸ್ತರ್ಹಿ ಕಾರ್ಯಾಕಾರ್ಯಧಿಯಾವಿತ್ಯಾಶಂಕ್ಯಾಽಽಹ —
ವೇದೇತಿ ।
ವೈದಿಕಸ್ಯಾರ್ಥಸ್ಯಾಬಾಧೇನ ತಥಾರ್ಥತ್ವೇ ಸಿದ್ಧೇ ಸಮೀಹಿತಸಾಧನತ್ವವಿಶಿಷ್ಟಂ ಚೇದ್ವಸ್ತು ತದಾ ಕರ್ತವ್ಯಮಿತಿ ಧಿಯಾಽನುತಿಷ್ಠತಿ । ತಚ್ಚೇದನಿಷ್ಟಸಾಧನತ್ವವಿಶಿಷ್ಟಂ ತದಾ ನ ಕಾರ್ಯಮಿತಿ ಧಿಯಾ ನಾನುತಿಷ್ಠತಿ । ಅತೋ ಮಾನಾತ್ತಸ್ಯಾನುಷ್ಠಾನಾನನುಷ್ಠಾನಹೇತೂ ಕಾರ್ಯಾಕಾರ್ಯಧಿಯಾವಿತ್ಯರ್ಥಃ ।
ತಥಾಽಪಿ ಬ್ರಹ್ಮಣೋ ವಾಕ್ಯಾರ್ಥತ್ವಂ ಪದಾರ್ಥತ್ವಂ ವಾ ? ನಾಽಽದ್ಯ ಇತ್ಯಾಹ —
ಅನನುಷ್ಠೇಯಯತ್ವ ಇತಿ ।
ತಸ್ಯಾಕಾರ್ಯತ್ವೇಽಪಿ ವಾಕ್ಯಾರ್ಥತ್ವಂ ಕಿಂ ನ ಸ್ಯಾದಿತ್ಯಾಶಂಕ್ಯಾಹ —
ನ ಹೀತಿ ।
ಉಭಯತ್ರಾಸತೀತಿಚ್ಛೇದಃ ।
ದ್ವಿತೀಯಂ ದೂಷಯತಿ —
ಪದಾರ್ಥತ್ವೇ ಚೇತಿ ।
ಬ್ರಹ್ಮಣಃ ಶಾಸ್ತ್ರಾರ್ಥತ್ವಮೇತದಿತ್ಯುಚ್ಯತೇ ಕಾರ್ಯಾಸ್ಪೃಷ್ಟೇಽರ್ಥೇ ವಾಕ್ಯಪ್ರಾಮಾಣ್ಯಂ ದೃಷ್ಟಾಂತೇನ ಸಾಧಯತಿ —
ನೇತ್ಯಾದಿನಾ ।
ಶುಕ್ಲಕೃಷ್ಣಲೋಹಿತಮಿಶ್ರಲಕ್ಷಣಂ ವರ್ಣಚತುಷ್ಟಯಂ ತದ್ವಿಶಿಷ್ಟೋ ಮೇರುರಸ್ತೀತ್ಯಾದಿಪ್ರಯೋಗೇ ಮೇರ್ವಾದಾವಕಾರ್ಯೇಽಪಿ ಸಮ್ಯಗ್ಧೀದರ್ಶನಾತ್ತತ್ತ್ವಮಸಿವಾಕ್ಯಾದಪಿ ಕಾರ್ಯಾಸ್ಪೃಷ್ಟೇ ಬ್ರಹ್ಮಣಿ ಸಮ್ಯಗ್ಜ್ಞಾನಸಿದ್ಧಿರಿತ್ಯರ್ಥಃ ।
ದೃಷ್ಟಾಂತೇಽಪಿ ಕಾರ್ಯಧೀರೇವ ವಾಕ್ಯಾದುದೇತೀತ್ಯಾಶಂಕ್ಯಾಽಽಹ —
ನ ಚೇತಿ ।
ನನು ತತ್ರ ಕ್ರಿಯಾಪದಾಧೀನಾ ಪದಸಂಹತಿರ್ಯುಕ್ತಾ ವೇದಾಂತೇಷು ಪುನಸ್ತದಭಾವಾತ್ಪದಸಂಹತ್ಯಯೋಗಾತ್ಕುತೋ ವಾಕ್ಯಪ್ರಮಾಣತ್ವಂ ಬ್ರಹ್ಮಣಃ ಸಂಭವತಿ ತತ್ರಾಽಽಹ —
ತಥೇತಿ ।
ವಿಮತಮಫಲಂ ಸಿದ್ಧಾರ್ಥಜ್ಞಾನತ್ವಾತ್ಸಮ್ಮತವದಿತ್ಯನುಮಾನಾತ್ತತ್ತ್ವಮಾದೇಃ ಸಿದ್ಧಾರ್ಥಸ್ಯಾಯುಕ್ತಂ ಮಾನತ್ವಮಿತಿ ಶಂಕತೇ —
ಮೇರ್ವಾದೀತಿ ।
ಶ್ರುತಿವಿರೋಧೇನಾನುಮಾನಂ ಧುನೀತೇ —
ನೇತ್ಯಾದಿನಾ ।
ವಿದ್ವದನುಭವವಿರೋಧಾಚ್ಚ ನೈವಮಿತ್ಯಾಹ —
ಸಂಸಾರೇತಿ ।
ಫಲಶ್ರುತೇರರ್ಥವಾದತ್ವೇನಾಮಾನತ್ವಾದನುಮಾನಬಾಧಕತೇತ್ಯಾಶಂಕ್ಯಾಽಽಹ —
ಅನನ್ಯೇತಿ ।
ಪರ್ಣಮಯೀತ್ವಾಧಿಕರಣನ್ಯಾಯೇನ ಜುಹ್ವಾಃ ಫಲಶ್ರುತೇರರ್ಥವಾದತ್ವಂ ಯುಕ್ತಮ್ । ಬ್ರಹ್ಮಧಿಯೋಽನ್ಯಶೇಷತ್ವಪ್ರಾಪಕಾಭಾವಾತ್ತತ್ಫಲಶ್ರುತೇರರ್ಥವಾದತ್ವಾಸಿದ್ಧಿರಿತಿ । ಅನ್ಯಥಾ ಶಾರೀರಕಾನಾರಂಭಃ ಸ್ಯಾದಿತ್ಯರ್ಥಃ ।