ಕಿಮನಯಾ ಕಥಯಾ ಸಿದ್ಧಮಿತ್ಯಾಶಂಕ್ಯಾಽಽಹ —

ಯಸ್ಮಾದಿತಿ ।

ಉಪಲಬ್ಧಿಸಿದ್ಧೇಽರ್ಥೇ ಯುಕ್ತಿಂ ಸಮುಚ್ಚಿನೋತಿ —

ವಿಶೇಷೇತಿ ।

ಸರ್ವಾನೇವ ವಾಗಾದೀನವಿಶೇಷೇಣಾಗ್ನ್ಯಾದಿಭಾವೇನ ಪ್ರಾಣಃ ಸಂಜಿತವಾನ್ । ನ ಚಾಮಧ್ಯಸ್ಥಃ ಸಾಧಾರಣಂ ಕಾರ್ಯಂ ನಿರ್ವರ್ತಯತಿ । ಅತೋ ಯುಕ್ತಿತೋಽಪ್ಯಯಮಾಸ್ಯಾಂತರಾಕಾಶೇ ವರ್ತಮಾನಃ ಸಿದ್ಧ ಇತ್ಯರ್ಥಃ ।

ಅಯಾಸ್ಯತ್ವವದಾಂಗಿರಸತ್ವಂ ಗುಣಾಂತರಂ ದರ್ಶಯತಿ —

ಅತ ಏವೇತಿ ।

ಸರ್ವಸಾಧಾರಣತ್ವಾದೇವೇತಿ ಯಾವತ್ ।

ತಥಾಽಪಿ ಕುತೋಽಸ್ಯಾಂಗಿರಸತ್ವಂ ಸಾಧಾರಣೇಽಪಿ ನಭಸಿ ತದನುಪಲಬ್ಧೇರಿತ್ಯಾಶಂಕ್ಯ ಪರಿಹರತಿ —

ಕಥಮಿತ್ಯಾದಿನಾ ।

ಅಂಗೇಷು ಚರಮಧಾತೋಃ ಸಾರತ್ವಪ್ರಸಿದ್ಧೇರ್ನ ಪ್ರಾಣಸ್ಯ ತಥಾತ್ವಮಿತಿ ಶಂಕಿತ್ವಾ ಸಮಾಧತ್ತೇ —

ಕಥಂ ಪುನರಿತ್ಯಾದಿನಾ ।

ಕಸ್ಮಾಚ್ಚ ಹೇತೋರಿತ್ಯಾದಿಚೋದ್ಯಪರಿಹಾರಮುಪಸಮ್ಹರತಿ —

ಯಸ್ಮಾಚ್ಚೇತಿ ।

ವಾಕ್ಯಾರ್ಥಂ ಪ್ರಪಂಚಯತಿ —

ಆತ್ಮಾ ಹೀತಿ ॥೮॥