ಅಥಾತ್ಮನೇ । ಯಥಾ ವಾಗಾದಿಭಿರಾತ್ಮಾರ್ಥಮಾಗಾನಂ ಕೃತಮ್ ; ತಥಾ ಮುಖ್ಯೋಽಪಿ ಪ್ರಾಣಃ ಸರ್ವಪ್ರಾಣಸಾಧಾರಣಂ ಪ್ರಾಜಾಪತ್ಯಫಲಮಾಗಾನಂ ಕೃತ್ವಾ ತ್ರಿಷು ಪವಮಾನೇಷು, ಅಥ ಅನಂತರಂ ಶಿಷ್ಟೇಷು ನವಸು ಸ್ತೋತ್ರೇಷು, ಆತ್ಮನೇ ಆತ್ಮಾರ್ಥಮ್ , ಅನ್ನಾದ್ಯಮ್ ಅನ್ನಂ ಚ ತದಾದ್ಯಂ ಚ ಅನ್ನಾದ್ಯಮ್ , ಆಗಾಯತ್ । ಕರ್ತುಃ ಕಾಮಸಂಯೋಗೋ ವಾಚನಿಕ ಇತ್ಯುಕ್ತಮ್ । ಕಥಂ ಪುನಸ್ತದನ್ನಾದ್ಯಂ ಪ್ರಾಣೇನಾತ್ಮಾರ್ಥಮಾಗೀತಮಿತಿ ಗಮ್ಯತ ಇತ್ಯತ್ರ ಹೇತುಮಾಹ — ಯತ್ಕಿಂಚೇತಿ — ಸಾಮಾನ್ಯಾನ್ನಮಾತ್ರಪರಾಮರ್ಶಾರ್ಥಃ ; ಹೀತಿ ಹೇತೌ ; ಯಸ್ಮಾಲ್ಲೋಕೇ ಪ್ರಾಣಿಭಿರ್ಯತ್ಕಿಂಚಿದನ್ನಮದ್ಯತೇ ಭಕ್ಷ್ಯತೇ ತದನೇನೈವ ಪ್ರಾಣೇನೈವ ; ಅನ ಇತಿ ಪ್ರಾಣಸ್ಯಾಖ್ಯಾ ಪ್ರಸಿದ್ಧಾ ; ಅನಃ ಶಬ್ದಃ ಸಾಂತಃ ಶಕಟವಾಚೀ, ಯಸ್ತ್ವನ್ಯಃ ಸ್ವರಾಂತಃ ಸ ಪ್ರಾಣಪರ್ಯಾಯಃ ; ಪ್ರಾಣೇನೈವ ತದದ್ಯತ ಇತ್ಯರ್ಥಃ ; ಕಿಂಚ, ನ ಕೇವಲಂ ಪ್ರಾಣೇನಾದ್ಯತ ಏವಾನ್ನಾದ್ಯಮ್ , ತಸ್ಮಿಞ್ಶರೀರಾಕಾರಪರಿಣತೇಽನ್ನಾದ್ಯೇ ಇಹ, ಪ್ರತಿತಿಷ್ಠತಿ ಪ್ರಾಣಃ ; ತಸ್ಮಾತ್ಪ್ರಾಣೇನಾತ್ಮನಃ ಪ್ರತಿಷ್ಠಾರ್ಥಮಾಗೀತಮನ್ನಾದ್ಯಮ್ । ಯದಪಿ ಪ್ರಾಣೇನಾನ್ನಾದನಂ ತದಪಿ ಪ್ರಾಣಸ್ಯ ಪ್ರತಿಷ್ಠಾರ್ಥಮೇವೇತಿ ನ ವಾಗಾದಿಷ್ವಿವ ಕಲ್ಯಾಣಾಸಂಗಜಪಾಪ್ಮಸಂಭವಃ ಪ್ರಾಣೇಽಸ್ತಿ ॥