ಬೃಹಸ್ಪತ್ಯಾದಿಧರ್ಮಕಂ ಪ್ರಾಣೋಪಾಸನಂ ವಕ್ತುಂ ವಾಕ್ಯಾಂತರಮವತಾರಯತಿ —

ಏಷ ಇತಿ ।

ತಸ್ಯ ವಿಧಾಂತರೇಣ ತಾತ್ಪರ್ಯಾಮಾಹ —

ನ ಕೇವಲಮಿತಿ ।

ಕಾರ್ಯಂ ಸ್ಥೂಲಶರೀರಂ ಪ್ರತ್ಯಕ್ಷತೋ ನಿರೂಪ್ಯಮಾಣಂ ರೂಪಾತ್ಮಕಂ ಕರಣಂ ಚ ಜ್ಞಾನಕ್ರಿಯಾಶಕ್ತಿಮತ್ಕರ್ಮಭೂತಂ ತಯೋರಾತ್ಮಾ ಪ್ರಾಣ ಇತ್ಯುಕ್ತ್ವಾ ನಾಮರಾಶೇರಪಿ ತಥೇತಿ ವಕ್ತುಂ ಕಂಡಿಕಾಚತುಷ್ಟಯಮಿತ್ಯರ್ಥಃ ।

ಕಿಮಿತಿ ಪ್ರಾಣಸ್ಯಾಽಽತ್ಮತ್ವೇನ ಸರ್ವಾತ್ಮತ್ವೋಕ್ತ್ಯಾ ಸ್ತುತಿರಿತ್ಯಾಶಂಕ್ಯಾಽಽಹ —

ಉಪಾಸ್ಯತ್ವಾಯೇತಿ ।

ಉಶಬ್ದೋಽಪ್ಯರ್ಥೋ ಬೃಹಸ್ಪತಿಶಬ್ದಾದುಪರಿ ಸಂಬಧ್ಯತೇ ।