ಏತಾನಿ ತಾನಿ ಯಜೂಂಷಿ — ‘ಅಸತೋ ಮಾ ಸದ್ಗಮಯ’ ‘ತಮಸೋ ಮಾ ಜ್ಯೋತಿರ್ಗಮಯ’ ‘ಮೃತ್ಯೋರ್ಮಾಮೃತಂ ಗಮಯ’ ಇತಿ । ಮಂತ್ರಾಣಾಮರ್ಥಸ್ತಿರೋಹಿತೋ ಭವತೀತಿ ಸ್ವಯಮೇವ ವ್ಯಾಚಷ್ಟೇ ಬ್ರಾಹ್ಮಣಂ ಮಂತ್ರಾರ್ಥಮ್ — ಸಃ ಮಂತ್ರಃ, ಯದಾಹ ಯದುಕ್ತವಾನ್ ; ಕೋಽಸಾವರ್ಥ ಇತ್ಯುಚ್ಯತೇ — ‘ಅಸತೋ ಮಾ ಸದ್ಗಮಯ’ ಇತಿ । ಮೃತ್ಯುರ್ವಾ ಅಸತ್ — ಸ್ವಾಭಾವಿಕಕರ್ಮವಿಜ್ಞಾನೇ ಮೃತ್ಯುರಿತ್ಯುಚ್ಯೇತೇ ; ಅಸತ್ ಅತ್ಯಂತಾಧೋಭಾವಹೇತುತ್ವಾತ್ ; ಸತ್ ಅಮೃತಮ್ — ಸತ್ ಶಾಸ್ತ್ರೀಯಕರ್ಮವಿಜ್ಞಾನೇ, ಅಮರಣಹೇತುತ್ವಾದಮೃತಮ್ । ತಸ್ಮಾದಸತಃ ಅಸತ್ಕರ್ಮಣೋಽಜ್ಞಾನಾಚ್ಚ, ಮಾ ಮಾಮ್ , ಸತ್ ಶಾಸ್ತ್ರೀಯಕರ್ಮವಿಜ್ಞಾನೇ, ಗಮಯ, ದೇವಭಾವಸಾಧನಾತ್ಮಭಾವಮಾಪಾದಯೇತ್ಯರ್ಥಃ । ತತ್ರ ವಾಕ್ಯಾರ್ಥಮಾಹ — ಅಮೃತಂ ಮಾ ಕುರ್ವಿತ್ಯೇವೈತದಾಹೇತಿ । ತಥಾ ತಮಸೋ ಮಾ ಜ್ಯೋತಿರ್ಗಮಯೇತಿ । ಮೃತ್ಯುರ್ವೈ ತಮಃ, ಸರ್ವಂ ಹ್ಯಜ್ಞಾನಮಾವರಣಾತ್ಮಕತ್ವಾತ್ತಮಃ, ತದೇವ ಚ ಮರಣಹೇತುತ್ವಾನ್ಮೃತ್ಯುಃ । ಜ್ಯೋತಿರಮೃತಂ ಪೂರ್ವೋಕ್ತವಿಪರೀತಂ ದೈವಂ ಸ್ವರೂಪಮ್ । ಪ್ರಕಾಶಾತ್ಮಕತ್ವಾಜ್ಜ್ಞಾನಂ ಜ್ಯೋತಿಃ ; ತದೇವಾಮೃತಮ್ ಅವಿನಾಶಾತ್ಮಕತ್ವಾತ್ ; ತಸ್ಮಾತ್ತಮಸೋ ಮಾ ಜ್ಯೋತಿರ್ಗಮಯೇತಿ । ಪೂರ್ವವನ್ಮೃತ್ಯೋರ್ಮಾಮೃತಂ ಗಮಯೇತ್ಯಾದಿ ; ಅಮೃತಂ ಮಾ ಕುರ್ವಿತ್ಯೇವೈತದಾಹ — ದೈವಂ ಪ್ರಾಜಾಪತ್ಯಂ ಫಲಭಾವಮಾಪಾದಯೇತ್ಯರ್ಥಃ । ಪೂರ್ವೋ ಮಂತ್ರೋಽಸಾಧನಸ್ವಭಾವಾತ್ಸಾಧನಭಾವಮಾಪಾದಯೇತಿ ; ದ್ವಿತೀಯಸ್ತು ಸಾಧನಭಾವಾದಪ್ಯಜ್ಞಾನರೂಪಾತ್ಸಾಧ್ಯಭಾವಮಾಪಾದಯೇತಿ । ಮೃತ್ಯೋರ್ಮಾಮೃತಂ ಗಮಯೇತಿ ಪೂರ್ವಯೋರೇವ ಮಂತ್ರಯೋಃ ಸಮುಚ್ಚಿತೋಽರ್ಥಸ್ತೃತೀಯೇನ ಮಂತ್ರೇಣೋಚ್ಯತ ಇತಿ ಪ್ರಸಿದ್ಧಾರ್ಥತೈವ । ನಾತ್ರ ತೃತೀಯೇ ಮಂತ್ರೇ ತಿರೋಹಿತಮಂತರ್ಹಿತಮಿವಾರ್ಥರೂಪಂ ಪೂರ್ವಯೋರಿವ ಮಂತ್ರಯೋರಸ್ತಿ ; ಯಥಾಶ್ರುತ ಏವಾರ್ಥಃ ॥