वृत्तं कीर्तयति —
एवं तावदिति ।
तत्र कर्मसमुच्चिते ज्ञाने देवताप्तौ शङ्कासंभवो नास्ति मिथः सहकृतयोर्ज्ञानकर्मणोस्तदाप्तिहेतुत्वादित्याह —
तत्रेति ।
समनन्तरं वाक्यमवतारयति —
अत इति ।
समुच्चयात्फलाप्तेर्दृष्टत्वादिति यावत् ।
न हेत्यादिना पदानि छिन्दन्वाक्यमादाय व्याकरोति —
अलोकार्हत्वायेति ।
तदेव स्फुटयति —
न हीति ।
तत्र दृष्टान्तमाह —
न हीति ।
दृश्यमानमाशंसनं तर्हि कस्मिन्विषये स्यादित्याशङ्क्याऽऽह —
असन्निकृष्टेति ।
प्राणात्मना व्यवस्थितस्य विदुषस्तदात्मभावं कदाचिदहं न प्रपद्येयमित्याशंसनं नास्तीति निगमयति —
तस्मादिति ।