అహమేకాకీ కోఽపి మాం హనిష్యతీత్యాత్మనాశవిషయవిపరీతజ్ఞానవత్త్వాత్ప్రజాపతిర్భీతవానిత్యత్ర కిం ప్రమాణమిత్యాశఙ్క్య కార్యగతేన భయలిఙ్గేన కారణే ప్రజాపతౌ తదనుమేయమిత్యాహ —
యస్మాదితి ।
తత్సామాన్యాదేకాకిత్వావిశేషాదితి యావత్ ।
ప్రజాపతేః సంసారాన్తర్భూతత్వే హేత్వన్తరమాహ —
కిఞ్చేతి ।
యథాఽస్మదాదిభీ రజ్జుస్థాణ్వాదౌ సర్పపురుషాదిభ్రమజనితభయనివృత్తయే విచారేణ తత్త్వజ్ఞానం సంపాద్యతే తథా ప్రజాపతిరపి భయస్య తద్ధేతోశ్చ విపరీతధియో ధ్వస్తిహేతుం తత్త్వజ్ఞానం విచార్య సంపాదితవానిత్యర్థః ।
పరమార్థదర్శనమేవ ప్రశ్నపూర్వకం విశదయతి —
కథమిత్యాదినా ।
తస్మిన్నిత్యత్ర తస్మాదిత్యాది పఠితవ్యమ్ ।
మచ్ఛబ్దోపలక్షితం ప్రత్యక్చైతన్యమద్వితీయబ్రహ్మరూపేణ జ్ఞాత్వా సహేతుం భీతిం ప్రజాపతిరక్షిపదిత్యుక్తమిదానీం తత్త్వజ్ఞానఫలమాహ —
తత ఇతి ।
కస్మాద్ధీత్యాదేరుత్తరస్య పూర్వేణ పౌనరుక్త్యమిత్యాశఙ్క్య విదుషో హేత్వభావాన్న భయమిత్యుక్తసమర్థనార్థత్వాదుత్తరస్య నైవమిత్యాహ —
తస్యేత్యాదినా ।
అనుపపత్తౌ హేతుమాహ —
యస్మాదితి ।
పరమార్థదర్శనేఽపి వస్త్వన్తరాత్కిమితి భయం న భవతీత్యాశఙ్క్యాఽఽహ —
ద్వితీయఞ్చేతి ।
అన్వయవ్యతిరేకాభ్యాం ద్వైతస్యావిద్యాప్రత్యుపస్థాపితత్వేఽపి కుతస్తదుత్థద్వైతదర్శనం భయకారణం న భవతీత్యాశఙ్క్యాఽఽహ —
న హీతి ।
తత్త్వజ్ఞానే సత్యాయోగాత్తదుత్థం ద్వైతం తద్దర్శనం చాయుక్తమిత్యతో హేత్వభావాద్భయానుపపత్తిరిత్యర్థః ।
అద్వైతజ్ఞానే భయనివృత్తిరిత్యత్ర మన్త్రం సంవాదయతి —
తత్రేతి ।
విరాడైక్యదర్శనేనైవ ప్రజాపతేర్భయమపనీతం నాద్వైతదర్శనేనేత్యస్మిన్నర్థేఽపి యన్మదన్యన్నాస్తీత్యాది శక్యం వ్యాఖ్యాతుమిత్యాశఙ్క్యాఙ్గీకుర్వన్నాహ —
యచ్చేతి ।
తదేవ ప్రశ్నద్వారా ప్రకటయతి —
కస్మాదిత్యాదినా ।