ಸಾ ಶತರೂಪಾ ಉ ಹ ಇಯಮ್ — ಸೇಯಂ ದುಹಿತೃಗಮನೇ ಸ್ಮಾರ್ತಂ ಪ್ರತಿಷೇಧಮನುಸ್ಮರಂತೀ ಈಕ್ಷಾಂಚಕ್ರೇ । ‘ಕಥಂ ನ್ವಿದಮಕೃತ್ಯಮ್ , ಯನ್ಮಾ ಮಾಮ್ ಆತ್ಮನ ಏವ ಜನಯಿತ್ವಾ ಉತ್ಪಾದ್ಯ ಸಂಭವತಿ ಉಪಗಚ್ಛತಿ ; ಯದ್ಯಪ್ಯಯಂ ನಿರ್ಘೃಣಃ, ಅಹಂ ಹಂತೇದಾನೀಂ ತಿರೋಽಸಾನಿ ಜಾತ್ಯಂತರೇಣ ತಿರಸ್ಕೃತಾ ಭವಾನಿ’ ಇತ್ಯೇವಮೀಕ್ಷಿತ್ವಾ ಅಸೌ ಗೌರಭವತ್ । ಉತ್ಪಾದ್ಯ ಪ್ರಾಣಿಕರ್ಮಭಿಶ್ಚೋದ್ಯಮಾನಾಯಾಃ ಪುನಃ ಪುನಃ ಸೈವ ಮತಿಃ ಶತರೂಪಾಯಾ ಮನೋಶ್ಚಾಭವತ್ । ತತಶ್ಚ ಋಷಭ ಇತರಃ । ತಾಂ ಸಮೇವಾಭವದಿತ್ಯಾದಿ ಪೂರ್ವವತ್ । ತತೋ ಗಾವೋಽಜಾಯಂತ । ತಥಾ ಬಡಬೇತರಾಭವತ್ ಅಶ್ವವೃಷ ಇತರಃ । ತಥಾ ಗರ್ದಭೀತರಾ ಗರ್ದಭ ಇತರಃ । ತತ್ರ ಬಡಬಾಶ್ವವೃಷಾದೀನಾಂ ಸಂಗಮಾತ್ತತ ಏಕಶಫಮ್ ಏಕಖುರಮ್ ಅಶ್ವಾಶ್ವತರಗರ್ದಭಾಖ್ಯಂ ತ್ರಯಮಜಾಯತ । ತಥಾ ಅಜಾ ಇತರಾಭವತ್ , ಬಸ್ತಶ್ಛಾಗ ಇತರಃ । ತಥಾವಿರಿತರಾ, ಮೇಷ ಇತರಃ । ತಾಂ ಸಮೇವಾಭವತ್ । ತಾಂ ತಾಮಿತಿ ವೀಪ್ಸಾ । ತಾಮಜಾಂ ತಾಮವಿಂ ಚೇತಿ ಸಮಭವದೇವೇತ್ಯರ್ಥಃ । ತತೋಽಜಾಶ್ಚಾವಯಶ್ಚಾಜಾವಯೋಽಜಾಯಂತ । ಏವಮೇವ ಯದಿದಂ ಕಿಂಚ ಯತ್ಕಿಂಚೇದಂ ಮಿಥುನಂ ಸ್ತ್ರೀಪುಂಸಲಕ್ಷಣಂ ದ್ವಂದ್ವಮ್ , ಆ ಪಿಪೀಲಿಕಾಭ್ಯಃ ಪಿಪೀಲಿಕಾಭಿಃ ಸಹ ಅನೇನೈವ ನ್ಯಾಯೇನ ತತ್ಸರ್ವಮಸೃಜತ ಜಗತ್ಸೃಷ್ಟವಾನ್ ॥