ಅಪೂರ್ವವಿಧಿವಾದೀ ಶಂಕತೇ —
ತಿಷ್ಠತು ತಾವದಿತಿ ।
ಸರ್ವೇಷಾಂ ಸ್ವಭಾವತೋ ವಿಷಯಪ್ರವಣಾನೀಂದ್ರಿಯಾಣಿ ನಾಽಽತ್ಮಜ್ಞಾನವಾರ್ತಾಮಪಿ ಮೃಷ್ಯಂತೇ ತದತ್ಯಂತಾಪ್ರಾಪ್ತತ್ವಾದಾತ್ಮಜ್ಞಾನೇ ಭವತ್ಯಪೂರ್ವವಿಧಿರಿತಿ ಭಾವಃ ।
ವಿಶಿಷ್ಟಸ್ಯಾಧಿಕಾರಿಣಃ ಶಾಬ್ದಜ್ಞಾನಂ ಶಬ್ದಾದೇವ ಸಿದ್ಧಮಿತಿ ಕಥಮಪ್ರಾಪ್ತಿರಿತ್ಯಾಶಂಕ್ಯಾಽಽಹ —
ಜ್ಞಾನೇತಿ ।
ನ ಖಲ್ವತ್ರ ಶಾಬ್ದಜ್ಞಾನಂ ವಿವಕ್ಷಿತಂ ಕಿಂತೂಪಾಸನಮ್ । ಉಪಾಸನಂ ನಾಮ ಮಾನಸಂ ಕರ್ಮ ತದೇವ ಜ್ಞಾನಾವೃತ್ತಿರೂಪತ್ವಾಜ್ಜ್ಞಾನಮಿತ್ಯೇಕತ್ವೇ ಸತ್ಯಪ್ರಾಪ್ತತ್ವಾದ್ವಿಧೇಯಮಿತ್ಯರ್ಥಃ ।
ತಯೋರೇಕತ್ವಂ ವಿವೃಣೋತಿ —
ನೇತ್ಯಾದಿನಾ ।
ಅನೇನ ಹೀತ್ಯಾದೌ ವೇದಶಬ್ದಸ್ಯಾರ್ಥಾಂತರವಿಷಯತ್ವವನ್ನ ಸ ವೇದೇತ್ಯತ್ರಾಪಿ ಕಿಂ ನ ಸ್ಯಾದಿತ್ಯಾಶಂಕ್ಯಽಽಹ —
ಅನೇನೇತಿ ।
ಉಕ್ತಶ್ರುತಿಭ್ಯೋ ಯದ್ವಿಜ್ಞಾನಂ ಶ್ರುತಂ ತದುಪಾಸನಮೇವೇತಿ ಯೋಜನಾ । ‘ಸ ಯೋಽತ ಏಕೈಕಮುಪಾಸ್ತೇ’(ಬೃ. ಉ. ೧ । ೪ । ೭) ಇತ್ಯುಪಕ್ರಮಾತ್ ‘ಆತ್ಮೇತ್ಯೇವೋಪಾಸೀತ’ ಇತ್ಯುಪಸಂಹಾರಾಚ್ಚ ನ ಸ ವೇದೇತ್ಯತ್ರ ತಾವದ್ವೇದಶಬ್ದಸ್ಯೋಪಾಸನಾರ್ಥತ್ವಮೇಷ್ಟವ್ಯಮನ್ಯಥೋಪಕ್ರಮೋಪಸಂಹಾರವಿರೋಧಾತ್ । ತಥಾ ಚಾರ್ಧವೈಶಸಾಸಂಭವಾದುಪಾಸನಮೇವ ಸರ್ವತ್ರ ವೇದನಂ ನ ತಚ್ಚ ಸರ್ವಥೈವಾಪ್ರಾಪ್ತಮಿತಿ ತಸ್ಮಿನ್ನಪೂರ್ವವಿಧಿಃ ಸ್ಯಾದಿತಿ ಭಾವಃ ।
ಇತಶ್ಚ ತಸ್ಮಿನ್ನೇಷ್ಟವ್ಯೋ ವಿಧಿರಿತ್ಯಾಹ —
ನ ಚೇತಿ ।
ಅತಃ ಪ್ರವರ್ತಕೋ ವಿಧಿರುಪೇಯ ಇತಿ ಶೇಷಃ ।
ಸ ಚಾತ್ಯಂತಾಪ್ರಾಪ್ತವಿಷಯತ್ವಾನ್ನಿಯಮಾದಿರೂಪೋ ನ ಭವತೀತ್ಯಾಹ —
ತಸ್ಮಾದಿತಿ ।
ಆತ್ಮೋಪಾಸ್ತಿರ್ವಿಧೇಯೇತ್ಯತ್ರ ಹೇತ್ವಂತರಮಾಹ —
ಕರ್ಮವಿಧೀತಿ ।
ಕರ್ಮಾತ್ಮಜ್ಞಾನವಿಧ್ಯೋಃ ಶಬ್ದಾನುಸಾರೇಣಾವಿಶೇಷಮಭಿದಧಾತಿ —
ಯಥೇತ್ಯಾದಿನಾ ।
ಸಂಪ್ರತ್ಯರ್ಥತೋಽಪ್ಯವಿಶೇಷಮಾಹ —
ಮಾನಸೇತಿ ।
ತದೇವ ದೃಷ್ಟಾಂತೇನ ಸ್ಪಷ್ಟಯತಿ —
ಯಥೇತಿ ।
ಯದಿ ಕ್ರಿಯಾ ವಿಧೀಯತೇ ಕಥಂ ಜ್ಞಾನಾತ್ಮಿಕೇತಿ ವಿಶೇಷ್ಯತೇ ತತ್ರಾಽಽಹ —
ತಥೇತಿ ।
ಇತಶ್ಚಾಽತ್ಮೋಪಾಸನೇ ವಿಧಿರಸ್ತೀತ್ಯಾಹ —
ಭಾವನೇತಿ ।
ವೇದಾಂತೇಷು ಭಾವನೋಪೇಕ್ಷಿತಾಂಶತ್ರಯೋಪಪತ್ತಿಂ ವಿಶದಯಿತುಂ ದೃಷ್ಟಾಂತಮಾಹ —
ಯಥೇತಿ ।
ಭಾವನಾಯಾ ವಿಧೀಯಮಾನತ್ವೇ ಸತೀತಿ ಶೇಷಃ । ಪ್ರೇರಣಾಧರ್ಮಕಃ ಶಬ್ದವ್ಯಾಪಾರಃ ಸ್ವಜ್ಞಾನಕರಣಕಃ ಸ್ತುತ್ಯಾದಿಜ್ಞಾನೇತಿಕರ್ತವ್ಯತಾಕಃ ಪುರುಷಪ್ರಯತ್ನಭಾವ್ಯನಿಷ್ಠಃ ಶಬ್ದಭಾವನೋಚ್ಯತೇ ।
ಸ್ವರ್ಗಂ ಯಾಗೇನ ಪ್ರಯಾಜಾದಿಭಿರುಪಕೃತ್ಯ ಸಾಧಯೇದಿತಿ ಪುರುಷಪ್ರವೃತ್ತಿರರ್ಥಭಾವನೇತಿ ವಿಭಾಗಃ ದೃಷ್ಟಾಂತಸ್ಥಮರ್ಥಂ ದಾರ್ಷ್ಟಾಂತಿಕೇ ಯೋಜಯತಿ —
ತಥೇತ್ಯಾದಿನಾ ।
ತ್ಯಾಗೋ ನಿಷಿದ್ಧಕಾಮ್ಯವರ್ಜನಮ್ । ಉಪರಮೋ ನಿತ್ಯನೈಮಿತ್ತಿಕತ್ಯಾಗಃ । ತಿತಿಕ್ಷಾದೀತ್ಯಾದಿಪದಂ ಸಮಾಧಾನಾದಿಸಂಗ್ರಹಾರ್ಥಮಿತ್ಯಂಶತ್ರಯಮಿತಿ ಸಂಬಂಧಃ । ಶಾಸ್ತ್ರಂ ‘ಶಾಂತೋ ದಾಂತ’(ಬೃ. ಉ. ೪ । ೪ । ೨೩) ಇತ್ಯಾದಿ । ಉಕ್ತಪ್ರಕಾರಮಂಶತ್ರಯಮನ್ಯದಪಿ ಸುಲಭಮಿತಿ ವಕ್ತುಮಾದಿಪದಮ್ ।
ವಿಧಿಯುಕ್ತಾನಾಂ ವೇದಾಂತಾನಾಂ ಕಾರ್ಯಪರತ್ವೇಽಪಿ ತದ್ಧೀನಾನಾಂ ತೇಷಾಂ ವಸ್ತುಪರತೇತ್ಯಾಶಂಕ್ಯಾಽಽಹ —
ಯಥಾ ಚೇತಿ ।
ವಿಧ್ಯುದ್ದೇಶತ್ವೇನ ತಚ್ಛೇಷತ್ವೇನೇತಿ ಯಾವತ್ ।
ಅಸ್ಥೂಲಾದಿವಾಕ್ಯಾನಾಮಾರೋಪಿತದ್ವೈತನಿಷೇಧೇನಾದ್ವಯಂ ವಸ್ತು ಸಮರ್ಪಯತಾಂ ಕಥಮುಪಾಸ್ತಿವಿಧಿಶೇಷತ್ವಮಿತ್ಯಾಶಂಕ್ಯಾಽಽಹ —
ನೇತ್ಯಾದಿನಾ ।
’ಬ್ರಹ್ಮ ವೇದ ಬ್ರಹ್ಮೈವ ಭವತಿ’ ‘ತರತಿ ಶೋಕಮಾತ್ಮವಿತ್’(ಛಾ. ಉ. ೭ । ೧ । ೩) ಇತ್ಯಾದೀನಾಂ ಫಲಾರ್ಪಕತ್ವೇನೋಪಾಸ್ತಿವಿಧ್ಯುಪಯೋಗಮಭಿಪ್ರೇತ್ಯಾಽಽಹ —
ಫಲಂಚೇತಿ ।
ಮೋಕ್ಷೋ ಬ್ರಹ್ಮಪ್ರಾಪ್ತಿಃ ।