ವಿದ್ಯಾಸೂತ್ರಂ ವಿಧಿಸ್ಪರ್ಶಂ ವಿನಾ ವಿವಕ್ಷಿತೇಽರ್ಥೇ ವ್ಯಾಖ್ಯಾಯಾಪೂರ್ವವಿಧಿರಯಮಿತಿ ಪಕ್ಷಂ ಪ್ರತ್ಯಾಹ —
ಆತ್ಮೇತ್ಯೇವೇತಿ ।
ಅತ್ಯಂತಾಪ್ರಾಪ್ತಾರ್ಥೋ ಹ್ಯಪೂರ್ವವಿಧಿರ್ಯಥಾ ಸ್ವರ್ಗಕಾಮೋಽಗ್ನಿಹೋತ್ರಂ ಜುಹುಯಾದಿತಿ । ನಾಯಂ ತಥಾ ಪಕ್ಷೇ ಪ್ರಾಪ್ತತ್ವಾದಾತ್ಮೋಪಾಸನಸ್ಯ । ತಸ್ಯ ತತ್ಪ್ರಾಪ್ತಿಶ್ಚ ಪುರುಷವಿಶೇಷಾಪೇಕ್ಷಯಾ ವಿಚಾರಾವಸಾನೇ ಸ್ಪಷ್ಟೀಭವಿಷ್ಯತೀತ್ಯರ್ಥಃ ।
ಇದಾನೀಮಾತ್ಮಜ್ಞಾನಸ್ಯಾವಿಧೇಯತ್ವಖ್ಯಾಪನಾರ್ಥಂ ವಸ್ತುಸ್ವಭಾವಾಲೋಚನಯಾ ನಿತ್ಯಪ್ರಾಪ್ತಿಮಾಹ —
ಯತ್ಸಾಕ್ಷಾದಿತಿ ।
ಉತ್ಪಾದ್ಯತಾಮುಕ್ತಶ್ರುತಿಭಿರಾತ್ಮವಿಜ್ಞಾನಂ ಕಿಂ ತಾವತೇತ್ಯತ ಆಹ —
ತತ್ರೇತಿ ।
ಕಾರಕಾದೀತ್ಯಾದಿಪದಂ ತದವಾಂತರಭೇದವಿಷಯಮ್ ।
ನನ್ವವಿದ್ಯಾಯಾಮಪನೀತಾಯಾಮಪಿ ರಾಗದ್ವೇಷಾದಿಸದ್ಭಾವಾದ್ವೈಧೀ ಪ್ರವೃತ್ತಿಃ ಸ್ಯಾನ್ನಹಿ ವಿದ್ವದವಿದುಷೋರ್ವ್ಯವಹಾರೇ ಕಶ್ಚಿದ್ವಿಶೇಷಃ ‘ಪಶ್ವಾದಿಭಿಶ್ಚಾವಿಶೇಷಾದಿ’ತಿ ನ್ಯಾಯಾದತ ಆಹ —
ತಸ್ಯಾಮಿತಿ ।
ಬಾಧಿತಾನುವೃತ್ತಿಮಾತ್ರಾನ್ನ ವೈಧೀ ಪ್ರವೃತ್ತಿರಬಾಧಿತಾಭಿಮಾನಮಂತರೇಣ ತದಯೋಗಾದಿತಿ ಭಾವಃ ।
ವಿದುಷಃ ಸುಷುಪ್ತತುಲ್ಯತ್ವಂ ವ್ಯಾವರ್ತಯತಿ —
ಪಾರಿಶೇಷ್ಯಾದಿತಿ ।
ಶ್ರೌತಜ್ಞಾನಾತ್ಪೂರ್ವಮಪಿ ಸರ್ವಾಸಾಂ ಚಿತ್ತವೃತ್ತೀನಾಂ ಜನ್ಮನೈವಾಽಽತ್ಮಚೈತನ್ಯವ್ಯಂಜಕತ್ವಾತ್ಪ್ರಾಪ್ತಮಾತ್ಮಜ್ಞಾನಂ ಶ್ರೌತೇ ತು ಜ್ಞಾನೇ ನಾಸ್ತ್ಯನಾತ್ಮೇತಿ ಸ್ಫುರಣಮಾತ್ಮಜ್ಞಾನಮೇವೇತಿ ನಿತ್ಯಪ್ರಾಪ್ತಿಮಭಿಪ್ರೇತ್ಯಾಽಽಹ —
ತಸ್ಮಾದಿತಿ ।
ಅಸ್ಮಿನ್ಪಕ್ಷ ಇತಿ ನಿತ್ಯಪ್ರಾಪ್ತತ್ವಪಕ್ಷೋಕ್ತಿಃ ।