ಅನೇನೇತ್ಯತ್ರ ವೇದೇತಿ ಜ್ಞಾನೇನೋಪಕ್ರಮ್ಯಾನುವಿಂದೇದಿತಿ ಲಾಭಮುಕ್ತ್ವಾ ಕೀರ್ತಿಮಿತ್ಯಾದಿಶ್ರುತೌ ಪುನರ್ಜ್ಞಾನಾರ್ಥೇನ ವಿದಿನೋಪಸಂಹಾರಾದನುವಿಂದೇದಿತಿ ಶ್ರುತೇರುಪಕ್ರಮೋಪಸಂಹಾರವಿರೋಧಃ ಸ್ಯಾದಿತಿ ಶಂಕತೇ —
ನನ್ವಿತಿ ।
ಶಂಕಿತಂ ವಿರೋಧಂ ನಿರಾಕರೋತಿ —
ನೇತಿ ।
ಕಥಂ ತಯೋರೈಕಾರ್ಥ್ಯಂ ಗ್ರಾಮಾದೌ ತದೇಕತ್ವಾಪ್ರಸಿದ್ಧೇರಿತ್ಯಾಶಂಕ್ಯಾಽಽಹ —
ಆತ್ಮನ ಇತಿ ।
ಗ್ರಾಮಾದಾವಪ್ರಾಪ್ತೇ ಪ್ರಾಪ್ತಿರೇವ ಲಾಭೋ ನ ಜ್ಞಾನಮಾತ್ರಂ ತಥಾಽತ್ರಾಪಿ ಕಿಂ ನ ಸ್ಯಾದಿತ್ಯಾಶಂಕ್ಯಾಽಽಹ —
ನೇತ್ಯಾದಿನಾ ।
ಜ್ಞಾನಲಾಭಶಬ್ದಯೋರರ್ಥಭೇದಸ್ತರ್ಹಿ ಕುತ್ರೇತ್ಯಾಶಂಕ್ಯಾಽಽಹ —
ಯತ್ರ ಹೀತಿ ।
ಅನಾತ್ಮನಿ ಲಬ್ಧೃಲಬ್ಧವ್ಯಯೋರ್ಜ್ಞಾತೃಜ್ಞೇಯಯೋಶ್ಚ ಭೇದೇ ಕ್ರಿಯಾಭೇದಾತ್ಫಲಭೇದಸಿದ್ಧಿರಿತ್ಯರ್ಥಃ ।
ನನ್ವಾತ್ಮಲಾಭೋಽಪಿ ಜ್ಞಾನಾದ್ಭಿದ್ಯತೇ ಲಾಭತ್ವಾದನಾತ್ಮಲಾಭವದಿತ್ಯಾಶಂಕ್ಯ ಜ್ಞಾನಹೇತುಮಾತ್ರಾನಧೀನತ್ವಮುಪಾಧಿರಿತ್ಯಾಹ —
ಸ ಚೇತಿ ।
ಅಪ್ರಾಪ್ತತ್ವಂ ವ್ಯಕ್ತೀಕರೋತಿ —
ಉತ್ಪಾದ್ಯೇತಿ ।
ತದ್ವ್ಯವಧಾನಮೇವ ಸಾಧಯತಿ —
ಕಾರಕೇತಿ ।
ಕಿಂಚಾನಾತ್ಮಲಾಭೋಽವಿದ್ಯಾಕಲ್ಪಿತಃ ಕಾದಾಚಿತ್ಕತ್ವಾತ್ಸಮ್ಮತವದಿತ್ಯಾಹ —
ಸ ತ್ವಿತಿ ।
ಕಿಂಚಾಸಾವವಿದ್ಯಾಕಲ್ಪಿತೋಽಪ್ರಾಮಾಣಿಕತ್ವಾತ್ಸಂಪ್ರತಿಪನ್ನವದಿತ್ಯಾಹ —
ಮಿಥ್ಯೇತಿ ।
ಪ್ರಕೃತೇ ವಿಶೇಷಂ ದರ್ಶಯತಿ —
ಅಯಂ ತ್ವಿತಿ ।
ವೈಪರೀತ್ಯಮೇವ ಸ್ಫೋರಯತಿ —
ಆತ್ಮತ್ವಾದಿತಿ ।
ಆತ್ಮನಸ್ತರ್ಹಿ ನಿತ್ಯಲಬ್ಧತ್ವಾನ್ನ ತತ್ರಾಲಬ್ಧತ್ವಬುದ್ಧಿಃ ಸ್ಯಾದಿತ್ಯಾಶಂಕ್ಯಾಽಽಹ —
ನಿತ್ಯೇತಿ ।
ಆತ್ಮನ್ಯಲಾಭೋಽಜ್ಞಾನಂ ಲಾಭಸ್ತು ಜ್ಞಾನಮಿತ್ಯೇತದ್ದೃಷ್ಟಾಂತೇನ ಸ್ಪಷ್ಟಯತಿ —
ಯಥೇತ್ಯಾದಿನಾ ।
ಶುಕ್ತಿಕಾಯಾಃ ಸ್ವರೂಪೇಣ ಗೃಹ್ಯಮಾಣಾಯಾ ಅಪೀತಿ ಯೋಜನಾ ।
ಆತ್ಮಲಾಭೋಽವಿದ್ಯಾನಿವೃತ್ತಿರೇವೇತ್ಯತ್ರೋಕ್ತಂ ವಕ್ಷ್ಯಮಾಣಂ ಚ ಗಮಕಂ ದರ್ಶಯತಿ —
ತಸ್ಮಾದಿತಿ ।
ಅವಿರೋಧಮುಪಸಂಹರತಿ —
ತಸ್ಮಾದಿತ್ಯಾದಿನಾ ।
ತಯೋರೇಕಾರ್ಥತ್ವೇಽಪಿ ಕಥಮನುವಿಂದೇತಿ ಮಧ್ಯೇ ಪ್ರಯುಜ್ಯತೇ —
ತತ್ರಾಽಽಹ –
ವಿಂದತೇರಿತಿ ।