అనేనేత్యత్ర వేదేతి జ్ఞానేనోపక్రమ్యానువిన్దేదితి లాభముక్త్వా కీర్తిమిత్యాదిశ్రుతౌ పునర్జ్ఞానార్థేన విదినోపసంహారాదనువిన్దేదితి శ్రుతేరుపక్రమోపసంహారవిరోధః స్యాదితి శఙ్కతే —

నన్వితి ।

శఙ్కితం విరోధం నిరాకరోతి —

నేతి ।

కథం తయోరైకార్థ్యం గ్రామాదౌ తదేకత్వాప్రసిద్ధేరిత్యాశఙ్క్యాఽఽహ —

ఆత్మన ఇతి ।

గ్రామాదావప్రాప్తే ప్రాప్తిరేవ లాభో న జ్ఞానమాత్రం తథాఽత్రాపి కిం న స్యాదిత్యాశఙ్క్యాఽఽహ —

నేత్యాదినా ।

జ్ఞానలాభశబ్దయోరర్థభేదస్తర్హి కుత్రేత్యాశఙ్క్యాఽఽహ —

యత్ర హీతి ।

అనాత్మని లబ్ధృలబ్ధవ్యయోర్జ్ఞాతృజ్ఞేయయోశ్చ భేదే క్రియాభేదాత్ఫలభేదసిద్ధిరిత్యర్థః ।

నన్వాత్మలాభోఽపి జ్ఞానాద్భిద్యతే లాభత్వాదనాత్మలాభవదిత్యాశఙ్క్య జ్ఞానహేతుమాత్రానధీనత్వముపాధిరిత్యాహ —

స చేతి ।

అప్రాప్తత్వం వ్యక్తీకరోతి —

ఉత్పాద్యేతి ।

తద్వ్యవధానమేవ సాధయతి —

కారకేతి ।

కిఞ్చానాత్మలాభోఽవిద్యాకల్పితః కాదాచిత్కత్వాత్సమ్మతవదిత్యాహ —

స త్వితి ।

కిఞ్చాసావవిద్యాకల్పితోఽప్రామాణికత్వాత్సంప్రతిపన్నవదిత్యాహ —

మిథ్యేతి ।

ప్రకృతే విశేషం దర్శయతి —

అయం త్వితి ।

వైపరీత్యమేవ స్ఫోరయతి —

ఆత్మత్వాదితి ।

ఆత్మనస్తర్హి నిత్యలబ్ధత్వాన్న తత్రాలబ్ధత్వబుద్ధిః స్యాదిత్యాశఙ్క్యాఽఽహ —

నిత్యేతి ।

ఆత్మన్యలాభోఽజ్ఞానం లాభస్తు జ్ఞానమిత్యేతద్దృష్టాన్తేన స్పష్టయతి —

యథేత్యాదినా ।

శుక్తికాయాః స్వరూపేణ గృహ్యమాణాయా అపీతి యోజనా ।

ఆత్మలాభోఽవిద్యానివృత్తిరేవేత్యత్రోక్తం వక్ష్యమాణం చ గమకం దర్శయతి —

తస్మాదితి ।

అవిరోధముపసంహరతి —

తస్మాదిత్యాదినా ।

తయోరేకార్థత్వేఽపి కథమనువిన్దేతి మధ్యే ప్రయుజ్యతే —

తత్రాఽఽహ –

విన్దతేరితి ।