ಯಥಾಽಗ್ನಿಹೋತ್ರಾದಿ ಮನುಷ್ಯತ್ವಾದಿಜಾತಿಮಂತಮರ್ಥಿತ್ವಾದಿವಿಶೇಷಣವಂತಂ ಚಾಧಿಕಾರಿಣಮಪೇಕ್ಷತೇ ನ ತಥಾ ಜ್ಞಾನಮಿತಿ ವಕ್ತುಂ ತದ್ಯೋ ಯೋ ದೇವಾನಾಮಿತ್ಯಾದಿವಾಕ್ಯಂ ತದಕ್ಷರಾಣಿ ವ್ಯಾಚಷ್ಟೇ —

ತತ್ತತ್ರೇತಿ ।

ಯಥೋಕ್ತೇನ ವಿಧಿನಾಽನ್ವಯಾದಿಕೃತಪದಾರ್ಥಪರಿಶೋಧನಾದಿನೇತ್ಯರ್ಥಃ । ಜ್ಞಾನಾದೇವ ಮುಕ್ತಿರ್ನ ಸಾಧನಾಂತರಾದಿತ್ಯೇವಕಾರಾರ್ಥಃ ।

ವಿವಕ್ಷಿತಮಧಿಕಾರ್ಯನಿಯಮಂ ಪ್ರಕಟಯತಿ —

ತಥೇತ್ಯಾದಿನಾ ।

ಯೋ ಯಃ ಪ್ರತ್ಯಬುಧ್ಯತ ಸ ಏವ ತದಭವದಿತಿ ಪೂರ್ವೇಣ ಸಂಬಂಧಃ ।

ಬ್ರಹ್ಮೈವಾವಿದ್ಯಯಾ ಸಂಸರತಿ ಮುಚ್ಯತೇ ಚ ವಿದ್ಯಯೇತ್ಯುಕ್ತತ್ವಾದ್ದೇವಾದೀನಾಂ ವಿದ್ಯಾವಿದ್ಯಾಭ್ಯಾಂ ಬಂಧಮೋಕ್ಷೋಕ್ತಿಸ್ತದ್ವಿರುದ್ಧೇತ್ಯಾಶಂಕ್ಯಾಽಽಹ —

ದೇವಾನಾಮಿತ್ಯಾದೀತಿ ।

ತತ್ತ್ವದೃಷ್ಟ್ಯೈವ ಭೇದವಚನೇ ಕಾ ಹಾನಿರಿತ್ಯಾಶಂಕ್ಯಾಽಽಹ —

ಪುರ ಇತಿ ।

ಆವಿದ್ಯಕಂ ಭೇದಮನೂದ್ಯ ತತ್ತದಾತ್ಮನಾ ಸ್ಥಿತಬ್ರಹ್ಮಚೈತನ್ಯಸ್ಯೈವ ವಿದ್ಯಾವಿದ್ಯಾಭ್ಯಾಂ ಬಂಧಮೋಕ್ಷೋಕ್ತೇರ್ನ ಪೂರ್ವಾಪರವಿರೋಧೋಽಸ್ತೀತಿ ಫಲಿತಮಾಹ —

ಅತ ಇತಿ ।

ಅವಿದ್ಯಾದೃಷ್ಟಿಮನೂದ್ಯ ತತ್ತ್ವದೃಷ್ಟಿಮನ್ವಾಚಷ್ಟೇ —

ಪರಮಾರ್ಥತಸ್ತ್ವಿತಿ ।

ಪ್ರಬೋಧಾತ್ಪ್ರಾಗಪಿ ತತ್ರ ತತ್ರ ದೇವಾದಿಶರೀರೇಷು ಪರಮಾರ್ಥತೋ ಬ್ರಹ್ಮೈವಾಽಽಸೀಚ್ಚೇದೌಪದೇಶಿಕಂ ಜ್ಞಾನಮನರ್ಥಕಮಿತ್ಯಾಶಂಕ್ಯಾಽಽಹ —

ಅನ್ಯಥೈವೇತಿ ।

ನಾನಾಜೀವವಾದಸ್ಯ ತು ನಾವಕಾಶಃ ಪ್ರಕ್ರಮವಿರೋಧಾದಿತ್ಯಾಶಯೇನಾಽಽಹ —

ತದಿತಿ ।

ತಥೈವೇತ್ಯುತ್ಪನ್ನಜ್ಞಾನಾನುಸಾರಿತ್ವಪರಾಮರ್ಶಃ ।