ಕ್ಷತ್ರೇ ಸೃಷ್ಟೇಽಪಿ, ಸ ನೈವ ವ್ಯಭವತ್ , ಕರ್ಮಣೇ ಬ್ರಹ್ಮ ತಥಾ ನ ವ್ಯಭವತ್ , ವಿತ್ತೋಪಾರ್ಜಯಿತುರಭಾವಾತ್ ; ಸ ವಿಶಮಸೃಜತ ಕರ್ಮಸಾಧನವಿತ್ತೋಪಾರ್ಜನಾಯ ; ಕಃ ಪುನರಸೌ ವಿಟ್ ? ಯಾನ್ಯೇತಾನಿ ದೇವಜಾತಾನಿ — ಸ್ವಾರ್ಥೇ ನಿಷ್ಠಾ, ಯ ಏತೇ ದೇವಜಾತಿಭೇದಾ ಇತ್ಯರ್ಥಃ — ಗಣಶಃ ಗಣಂ ಗಣಮ್ , ಆಖ್ಯಾಯಂತೇ ಕಥ್ಯಂತೇ — ಗಣಪ್ರಾಯಾ ಹಿ ವಿಶಃ ; ಪ್ರಾಯೇಣ ಸಂಹತಾ ಹಿ ವಿತ್ತೋಪಾರ್ಜನೇ ಸಮರ್ಥಾಃ, ನ ಏಕೈಕಶಃ — ವಸವಃ ಅಷ್ಟಸಂಖ್ಯೋ ಗಣಃ, ತಥೈಕಾದಶ ರುದ್ರಾಃ ; ದ್ವಾದಶ ಆದಿತ್ಯಾಃ, ವಿಶ್ವೇ ದೇವಾಃ ತ್ರಯೋದಶ ವಿಶ್ವಾಯಾ ಅಪತ್ಯಾನಿ — ಸರ್ವೇ ವಾ ದೇವಾಃ, ಮರುತಃ ಸಪ್ತ ಸಪ್ತ ಗಣಾಃ ॥