ತತ್ಪ್ರಸಿದ್ಧಿಮುಪಪಾದಯಿತುಂ ಪೃಚ್ಛತಿ —
ನನ್ವಿತಿ ।
ಸಾಧ್ಯಸಾಧನಾತ್ಮಕೇ ಜಗತಿ ಯತ್ಪಿತೃತ್ವಮವಿದ್ಯಾವತೋ ಭಾವಿ ತತ್ಪ್ರತ್ಯಕ್ಷತ್ವಾತ್ಪ್ರಸಿದ್ಧಮ್ ಅನುಭೂಯತೇ ಹಿ ಜಾಯಾದಿ ಸಂಪಾದಯನ್ನವಿದ್ವಾನಿತ್ಯಾಹ —
ಉಚ್ಯತ ಇತಿ ।
ಶ್ರುತ್ಯಾ ಚ ಪ್ರಾಗುಕ್ತತ್ವಾತ್ಪ್ರಸಿದ್ಧಮೇತದಿತ್ಯಾಹ —
ಅಭಿಹಿತಂಚೇತಿ ।
ಯಚ್ಚ ಮೇಧಾತಪೋಭ್ಯಾಂ ಸ್ರಷ್ಟೃತ್ವಂ ಮಂತ್ರಬ್ರಾಹ್ಮಣಯೋರುಕ್ತಂ ತದಪಿ ಪ್ರಸಿದ್ಧಮೇವ ವಿದ್ಯಾಕರ್ಮಪುತ್ರಾಣಾಮಭಾವೇ ಲೋಕತ್ರಯೋತ್ಪತ್ತ್ಯನುಪಪತ್ತೇರಿತ್ಯಾಹ —
ತತ್ರ ಚೇತಿ ।
ಪೂರ್ವೋತ್ತರಗ್ರಂಥಃ ಸಪ್ತಮ್ಯರ್ಥಃ ।
ಪುತ್ರೇಣೈವಾಯಂ ಲೋಕೋ ಜಯ್ಯ ಇತ್ಯಾದೌ ವಕ್ಷ್ಯಮಾಣತ್ವಾಚ್ಚಾಸ್ಯಾರ್ಥಾಸ್ಯ ಪ್ರಸಿದ್ಧತೇತ್ಯಾಹ —
ವಕ್ಷ್ಯಮಾಣಂಚೇತಿ ।
ಮಂತ್ರಾರ್ಥಸ್ಯ ಪ್ರಸಿದ್ಧತ್ವೇ ಮಂತ್ರಸ್ಯ ಪ್ರಸಿದ್ಧಾರ್ಥವಿಷಯಂ ಬ್ರಾಹ್ಮಣಮುಪಪನ್ನಮಿತ್ಯುಪಸಂಹರತಿ —
ತಸ್ಮಾದಿತಿ ।
ಪ್ರಕಾರಾಂತರೇಣ ಮಂತ್ರಾರ್ಥಸ್ಯ ಪ್ರಸಿದ್ಧತ್ವಮಾಹ —
ಏಷಣಾ ಹೀತಿ ।
ಫಲವಿಷಯತ್ವಂ ತಸ್ಯಾಃ ಸ್ವಾನುಭವಸಿದ್ಧಮಿತಿ ವಕ್ತುಂ ಹಿಶಬ್ದಃ ।
ತಸ್ಯಾ ಲೋಕಪ್ರಸಿದ್ಧತ್ವೇಽಪಿ ಕಥಂ ಮಂತ್ರಾರ್ಥಸ್ಯ ಪ್ರಸಿದ್ಧತ್ವಮತ ಆಹ —
ಏಷಣಾ ಚೇತಿ ।
ಜಾಯಾದ್ಯಾತ್ಮಕಸ್ಯ ಕಾಮಸ್ಯ ಸಂಸಾರಾರಂಭಕತ್ವವನ್ಮೋಕ್ಷೇಽಪಿ ಕಾಮಃ ಸಂಸಾರಮಾರಭೇತ ಕಾಮತ್ವಾವಿಶೇಷಾದಿತ್ಯತಿಪ್ರಸಂಗಮಾಶಂಕ್ಯಾಽಽಹ —
ಬ್ರಹ್ಮವಿದ್ಯೇತಿ ।
ತಸ್ಯಾ ವಿಷಯೋ ಮೋಕ್ಷಃ । ತಸ್ಮಿನ್ನದ್ವಿತೀಯತ್ವಾದ್ರಾಗಾದಿಪರಿಪಂಥಿನಿ ಕಾಮಾಪರಪರ್ಯಾಯೋ ರಾಗೋ ನಾವಕಲ್ಪತೇ । ನ ಹಿ ಮಿಥ್ಯಾಜ್ಞಾನನಿದಾನೋ ರಾಗಃ ಸಮ್ಯಗ್ಜ್ಞಾನಾಧಿಗಮ್ಯೇ ಮೋಕ್ಷೇ ಸಂಭವತಿ । ಶ್ರದ್ಧಾ ತು ತತ್ರ ಭವತಿ ತತ್ತ್ವಬೋಧಾಧೀನತಯಾ ಸಂಸಾರವಿರೋಧಿನಿ ತನ್ನ ಸಂಸಾರಾನುಷಕ್ತಿರ್ಮುಕ್ತಾವಿತ್ಯರ್ಥಃ ।
ಶಾಸ್ತ್ರೀಯಸ್ಯ ಜಾಯಾದೇಃ ಸಂಸಾರಹೇತುತ್ವೇ ಕರ್ಮಾದೇರಶಾಸ್ತ್ರೀಯಸ್ಯ ಕಥಂ ತದ್ಧೇತುತ್ವಮಿತ್ಯಾಶಂಕ್ಯಾಽಽಹ —
ಏತೇನೇತಿ ।
ಅವಿದ್ಯೋತ್ಥಸ್ಯ ಕಾಮಸ್ಯ ಸಂಸಾರಹೇತುತ್ವೋಪದರ್ಶನೇನೇತಿ ಯಾವತ್ । ಸ್ವಾಭಾವಿಕಾಭ್ಯಾಮವಿದ್ಯಾಧೀನಕಾಮಪ್ರಯುಕ್ತಾಭ್ಯಾಮಿತ್ಯರ್ಥಃ ।
ಇತಶ್ಚ ತಯೋರ್ಜಗತ್ಸೃಷ್ಟಿಪ್ರಯೋಜಕತ್ವಮೇಷ್ಟವ್ಯಮಿತ್ಯಾಹ —
ಸ್ಥಾವರಾಂತಸ್ಯೇತಿ ।
ಯತ್ಸಪ್ತಾನ್ನಾನೀತ್ಯಾದಿಮಂತ್ರಸ್ಯ ಮೇಧಯಾ ಹೀತ್ಯಾದಿಬ್ರಾಹ್ಮಣಸ್ಯ ಚಾಕ್ಷರೋತ್ಥಮರ್ಥಮುಕ್ತ್ವಾ ತಾತ್ಪರ್ಯಮಾಹ —
ವಿವಕ್ಷಿತಸ್ತ್ವಿತಿ ।
ಶಾಸ್ತ್ರಪರವಶಸ್ಯ ಶಾಸ್ತ್ರವಶಾದೇವ ಸಾಧ್ಯಸಾಧನಭಾವಾದಶಾಸ್ತ್ರೀಯಾದ್ವೈತಮುಖ್ಯಸಂಭವಾನ್ನ ತಸ್ಯಾತ್ರ ವಿವಕ್ಷಿತಮಿತ್ಯರ್ಥಃ ।
ಶಾಸ್ತ್ರೀಯಸ್ಯ ಸಾಧ್ಯಸಾಧನಭಾವಸ್ಯ ವಿವಕ್ಷಿತತ್ವೇ ಹೇತುಮಾಹ —
ಬ್ರಹ್ಮೇತಿ ।
ತದೇವ ಪ್ರಪಂಚಯತಿ —
ಸರ್ವೋ ಹೀತಿ ।
ದುಃಖಯತೀತಿ ದುಃಖಸ್ತದ್ಧೇತುರಿತಿ ಯಾವತ್ । ಪ್ರಕೃತಮಂತ್ರಬ್ರಾಹ್ಮಣವ್ಯಾಖ್ಯಾಸಮಾಪ್ತಾವಿತಿಶಬ್ದೋ ವಿವಕ್ಷಿತಾರ್ಥಪ್ರದರ್ಶನಸಮಾಪ್ತೋ ವಾ ।