ಕಾಮಾದಿವಾಕ್ಯಮವತಾರ್ಯ ವ್ಯಾಕುರ್ವನ್ಮನಸಃ ಸ್ವರೂಪಂ ಪ್ರತಿ ಸಂಶಯಂ ನಿರಸ್ಯತಿ —
ಅಸ್ತಿತ್ವ ಇತಿ ।
ಅಶ್ರದ್ಧಾದಿವದಕಾಮಾದಿರಪಿ ವಿವಕ್ಷಿತೋಽತ್ರೇತಿ ಮತ್ವಾ ಮನೋಬುದ್ಧ್ಯೋರೇಕತ್ವಮುಪೇತ್ಯೋಪಸಂಹರತಿ —
ಇತ್ಯೇತದಿತಿ ।
ದ್ವೈತಪ್ರವೃತ್ತ್ಯುನ್ಮುಖಂ ಮನೋ ಭೋಕ್ತೃಕರ್ಮವಶಾನ್ನಾರ್ಥಾಕಾರೇಣ ವಿವರ್ತತ ಇತ್ಯಭಿಪ್ರೇತ್ಯಾನಂತರವಾಕ್ಯಮವತಾರಯತಿ —
ಮನೋಸ್ತಿತ್ವಮಿತಿ ।
ತದೇವಾನ್ಯತ್ಕಾರಣಂ ಸ್ಫೋರಯತಿ —
ಯಸ್ಮಾದಿತಿ ।
ತಸ್ಮಾದಸ್ತಿ ವಿವೇಕಕಾರಣಮಂತಃಕರಣಮಿತಿ ಸಂಬಂಧಃ ।
ಚಕ್ಷುರಸಂಪ್ರಯೋಗಾತ್ತೇನ ಸ್ಪರ್ಶವಿಶೇಷಾದರ್ಶನೇಽಪಿ ಸಂಪ್ರಯುಕ್ತಯಾ ತ್ವಚಾ ವಿನಾಽಪಿ ಮನೋ ವಿಶೇಷದರ್ಶನಂ ಸ್ಯಾದಿತ್ಯಾಶಂಕ್ಯಾಽಽಹ —
ಯದೀತಿ ।
ತ್ವಙ್ಮಾತ್ರಸ್ಯ ಸ್ಪರ್ಶಮಾತ್ರಗ್ರಾಹಿತ್ವೇನ ವಿವೇಕತ್ವಾಯೋಗಾದಿತ್ಯರ್ಥಃ ।
ವಿವೇಚಕೇ ಕಾರಣಾಂತರೇ ಸತ್ಯಪಿ ಕುತೋ ಮನಃಸಿದ್ಧಿಸ್ತತ್ರಾಽಽಹ —
ಯತ್ತದಿತಿ ।