ವೃತ್ತಂ ಕೀರ್ತಯತಿ —
ಅಸ್ತಿ ತಾವದಿತಿ ।
ಉತ್ತರಗ್ರಂಥಮವತಾರಯಿತುಂ ಭೂಮಿಕಾಂ ಕರೋತಿ —
ತ್ರೀಣೀತಿ ।
ಏವಂ ಭೂಮಿಕಾಮಾರಚಯ್ಯಾಽಽಧ್ಯಾತ್ಮಿಕವಾಗ್ವ್ಯಾಖ್ಯಾನಾರ್ಥಂ ಯಃ ಕಶ್ಚೇತ್ಯಾದಿ ವಾಕ್ಯಮಾದಾಯ ವ್ಯಾಕರೋತಿ —
ಅಥೇತ್ಯಾದಿನಾ ।
ಶಬ್ದಪರ್ಯಾಯೋ ಧ್ವನಿರ್ದ್ವಿವಿಧೋ ವರ್ಣಾತ್ಮಕೋಽವರ್ಣಾತ್ಮಕಶ್ಚ । ತತ್ರಾಽಽದ್ಯೋ ವ್ಯವಹರ್ತೃಭಿಸ್ತಾಲ್ವಾದಿಸ್ಥಾನವ್ಯಂಗ್ಯೋ ದ್ವಿತೀಯೋ ಮೇಘಾದಿಕೃತಃ । ಸ ಸರ್ವೋಽಪಿ ವಾಗೇವೇತ್ಯರ್ಥಃ ।
ಪ್ರಕಾಶಮಾತ್ರಂ ವಾಗಿತ್ಯುಕ್ತ್ವಾ ತತ್ರ ಪ್ರಮಾಣಮಾಹ —
ಇದಂ ತಾವದಿತಿ ।
ತಸ್ಮಾದಭಿದೇಯನಿರ್ಣಾಯಕತ್ವಾನ್ನಾಸಾವಪಲಾಪಾರ್ಹೇತಿ ಶೇಷಃ ।
ವಾಚೋಽಪಿ ಪ್ರಕಾಶ್ಯತ್ವಾತ್ಕಥಂ ಪ್ರಕಾಶಕಮಂತ್ರವಾಗಿತ್ಯುಕ್ತಮಿತ್ಯಾಶಂಕ್ಯಾಽಽಹ —
ಏಷೇತಿ ।
ದೃಷ್ಟಾಂತಂ ಸಮರ್ಥಯತೇ —
ನ ಹೀತಿ ।
ಪ್ರಕಾರಾಂತರೇಣ ಸಜಾತೀಯೇನೇತಿ ಶೇಷಃ । ಪ್ರಕಾಶಿಕಾಽಪಿ ವಾಕ್ಪ್ರಕಾಶ್ಯಾ ಚೇತ್ತತ್ರಾಪಿ ಪ್ರಕಾಶಕಾಂತರಮೇಷ್ಟವ್ಯಮಿತ್ಯನವಸ್ಥಾ ಸ್ಯಾತ್ತನ್ನಿರಾಸಾರ್ಥಮೇಷಾ ಹಿ ನೇತಿ ಶ್ರುತಿಃ ಪ್ರಕಾಶಕಮಾತ್ರಂ ವಾಗಿತ್ಯಾಹ । ಸ್ವಪರನಿರ್ವಾಹಕಸ್ತುಶಬ್ದಃ ।
ತಸ್ಮಾತ್ಪ್ರಕಾಶಕತ್ವಂ ಕಾರ್ಯಂ ಯತ್ರ ದೃಶ್ಯತೇ ತತ್ರ ವಾಚಃ ಸ್ವರೂಪಮನುಗತಮೇವೇತ್ಯಾಹ —
ತದ್ವದಿತ್ಯಾದಿನಾ ।