ಯತ್ಪೂರ್ವಮಾಧಿದೈವಿಕತ್ರ್ಯನ್ನಾತ್ಮಕಪ್ರಜಾಪತ್ಯುಪಾಸನಮುಕ್ತಂ ತದಹಮಸ್ಮಿ ಪ್ರಜಾಪತಿರಿತ್ಯಹಂಗ್ರಹೇಣ ಕರ್ತವ್ಯಮಿತ್ಯಾಹ —
ಯೋ ವಾ ಇತಿ ।
ಪ್ರತ್ಯಕ್ಷಮುಪಲಭ್ಯಮಾನಂ ಪ್ರಜಾಪತಿಂ ಪ್ರಶ್ನದ್ವಾರಾ ಪ್ರಕಟಯತಿ —
ಕೋಽಸಾವಿತಿ ।
ತಸ್ಯ ಪ್ರಜಾಪತಿತ್ವಮಪ್ರಸಿದ್ಧಮಿತ್ಯಾಶಂಕ್ಯ ಪರಿಹರತಿ —
ಕೇನೇತ್ಯಾದಿನಾ ।
ಕಲಾನಾಂ ಜಗದ್ವಿಪರಿಣಾಮಹೇತುತ್ವಂ ಕರ್ಮೇತ್ಯುಕ್ತಂ ವಿತ್ತೇಽಪಿ ಕರ್ಮಹೇತುತ್ವಮಸ್ತಿ ತೇನ ತತ್ರ ಕಲಾಶಬ್ದಪ್ರವೃತ್ತಿರುಚಿತೇತ್ಯಾಹ —
ವಿತ್ತೇತಿ ।
ಯಥಾ ಚಂದ್ರಮಾಃ ಕಲಾಭಿಃ ಶುಕ್ಲಕೃಷ್ಣಪಕ್ಷಯೋರಾಪೂರ್ಯತೇಽಪಕ್ಷೀಯತೇ ಚ ತಥಾ ಸ ವಿದ್ವಾನ್ವಿತ್ತೇನೈವೋಪಚೀಯಮಾನೇನಾಽಽಪೂರ್ಯತೇಽಪಚೀಯಮಾನೇನ ಚಾಪಕ್ಷೀಯತೇ । ಏತಚ್ಚ ಲೋಕಪ್ರಸಿದ್ಧತ್ವಾನ್ನ ಪ್ರತಿಪಾದನಸಾಪೇಕ್ಷಮಿತ್ಯಾಹ —
ಸ ಚಂದ್ರವದಿತಿ ।
ಆತ್ಮೈವ ಧ್ರುವಾ ಕಲೇತ್ಯುಕ್ತಂ ತದೇವ ರಥಚಕ್ರದೃಷ್ಟಾಂತೇನ ಸ್ಪಷ್ಟಯತಿ —
ತದೇತದಿತಿ ।
ನಾಭಿಃ ಚಕ್ರಪಿಂಡಿಕಾ ತತ್ಸ್ಥಾನೀಯಂ ವಾ ನಭ್ಯಂ ತದೇವ ಪ್ರಶ್ನದ್ವಾರಾ ಸ್ಫೋರಯತಿ —
ಕಿಂ ತದಿತಿ ।
ಶರೀರಸ್ಯ ಚಕ್ರಪಿಂಡಿಕಾಸ್ಥಾನೀಯತ್ವಮಯುಕ್ತಂ ಪರಿವಾರಾದರ್ಶನಾದಿತ್ಯಾಶಂಕ್ಯಾಽಽಹ —
ಪ್ರಧಿರಿತಿ ।
ಶರೀರಸ್ಯ ರಥಚಕ್ರಪಿಂಡಿಕಾಸ್ಥಾನೀಯತ್ವೇ ಫಲಿತಮಾಹ —
ತಸ್ಮಾದಿತಿ ।
ಪದಾರ್ಥಮುಕ್ತ್ವಾ ವಾಕ್ಯಾರ್ಥಮಾಹ —
ಜೀವಂಶ್ಚೇದಿತಿ ॥೧೫॥