आवेशप्रकारबुभुत्सायामुत्तरवाक्यप्रवृत्तिं प्रतिजानीते —

कथमित्यदिना ।

पृथिव्यै चेत्यादिवाक्यस्य व्यावर्त्यं पक्षं वृत्तानुवादपूर्वकमुत्थापयति —

एवमिति ।

अत्रेति वैदिकं पक्षं निर्धारयितुं सप्तमी ।

बहुवदनशीलत्वे हेतुः —

श्रुत्युक्तेति ।

मोक्षार्थतामृणापाकरणश्रुतिस्मृतिभ्यां वदन्तीति शेषः ।

मीमांसकपक्षं प्रकृतश्रुतिविरोधेन दूषयति —

तेषामिति ।

कथमित्याशङ्क्य श्रुतेरादिमध्यावसानालोचनया पुत्रादेः संसारफलत्वावगमान्न मुक्तिफलतेत्याह —

जायेत्यादिना ।

पुत्रादीनाञ्चेति चकारादेतावान्वै काम इति मध्यसंग्रहः ।

यदुक्तमृणापाकरणश्रुतिस्मृतिभ्यां पुत्रादेर्मुक्तिफलतेति तत्राऽऽह —

तस्मादिति ।

पुत्रादेः श्रुतं संसारफलत्वं पराम्रष्टुं तच्छब्दः । श्रुतिशब्दः स्मृतेरुपलक्षणार्थः ।

श्रुतिस्मृत्योरविरक्तविषयत्वे वाक्यशेषमनुकूलयति —

वक्ष्यति चेति ।