అథేదమాశఙ్క్యతే — సర్వప్రాణినామాత్మా భవతీత్యుక్తమ్ ; తస్య చ సర్వప్రాణికార్యకరణాత్మత్వే సర్వప్రాణిసుఖదుఃఖైః సమ్బధ్యేతేతి — తన్న । అపరిచ్ఛిన్నబుద్ధిత్వాత్ — పరిచ్ఛిన్నాత్మబుద్ధీనాం హ్యాక్రోశాదౌ దుఃఖసమ్బన్ధో దృష్టః -, అనేనాహమాక్రుష్ట ఇతి ; అస్య తు సర్వాత్మనో య ఆక్రుశ్యతే యశ్చాక్రోశతి తయోరాత్మత్వబుద్ధివిశేషాభావాత్ న తన్నిమిత్తం దుఃఖముపపద్యతే । మరణదుఃఖవచ్చ నిమిత్తాభావాత్ — యథా హి కస్మింశ్చిన్మృతే కస్యచిద్దుఃఖముత్పద్యతే — మమాసౌ పుత్రో భ్రాతా చేతి — పుత్రాదినిమిత్తమ్ , తన్నిమిత్తాభావే తన్మరణదర్శినోఽపి నైవ దుఃఖముపజాయతే, తథా ఈశ్వరస్యాపి అపరిచ్ఛిన్నాత్మనో మమతవతాదిదుఃఖనిమిత్తమిథ్యాజ్ఞానాదిదోషాభావాత్ నైవ దుఃఖముపజాయతే । తదేతదుచ్యతే — యదు కిఞ్చ యత్కిఞ్చ ఇమాః ప్రజాః శోచన్తి అమైవ సహైవ ప్రజాభిః తచ్ఛోకాదినిమిత్తం దుఃఖం సంయుక్తం భవతి ఆసాం ప్రజానామ్ పరిచ్ఛిన్నబుద్ధిజనితత్వాత్ ; సర్వాత్మనస్తు కేన సహ కిం సంయుక్తం భవేత్ వియుక్తం వా । అముం తు ప్రాజాపత్యే పదే వర్తమానం పుణ్యమేవ శుభమేవ — ఫలమభిప్రేతం పుణ్యమితి — నిరతిశయం హి తేన పుణ్యం కృతమ్ , తేన తత్ఫలమేవ గచ్ఛతి ; న హ వై దేవాన్పాపం గచ్ఛతి, పాపఫలస్యావసరాభావాత్ — పాపఫలం దుఃఖం న గచ్ఛతీత్యర్థః ॥