ಅಥ ಅನಂತರಮ್ ಅಧಿದೈವತಂ ದೇವತಾವಿಷಯಂ ದರ್ಶನಮುಚ್ಯತೇ । ಕಸ್ಯ ದೇವತಾವಿಶೇಷಸ್ಯ ವ್ರತಧಾರಣಂ ಶ್ರೇಯ ಇತಿ ಮೀಮಾಂಸ್ಯತೇ । ಅಧ್ಯಾತ್ಮವತ್ಸರ್ವಮ್ । ಜ್ವಲಿಷ್ಯಾಮ್ಯೇವಾಹಮಿತ್ಯಗ್ನಿರ್ದಧ್ರೇ ; ತಪ್ಸ್ಯಾಮ್ಯಹಮಿತ್ಯಾದಿತ್ಯಃ ; ಭಾಸ್ಯಾಮ್ಯಹಮಿತಿ ಚಂದ್ರಮಾಃ ; ಏವಮನ್ಯಾ ದೇವತಾ ಯಥಾದೈವತಮ್ । ಸಃ ಅಧ್ಯಾತ್ಮಂ ವಾಗಾದೀನಾಮೇಷಾಂ ಪ್ರಾಣಾನಾಂ ಮಧ್ಯೇ ಮಧ್ಯಮಃ ಪ್ರಾಣೋ ಮೃತ್ಯುನಾ ಅನಾಪ್ತಃ ಸ್ವಕರ್ಮಣೋ ನ ಪ್ರಚ್ಯಾವಿತಃ ಸ್ವೇನ ಪ್ರಾಣವ್ರತೇನಾಭಗ್ನವ್ರತೋ ಯಥಾ, ಏವಮ್ ಏತಾಸಾಮಗ್ನ್ಯಾದೀನಾಂ ದೇವತಾನಾಂ ವಾಯುರಪಿ । ಮ್ಲೋಚಂತಿ ಅಸ್ತಂ ಯಂತಿ ಸ್ವಕರ್ಮಭ್ಯ ಉಪರಮಂತೇ — ಯಥಾ ಅಧ್ಯಾತ್ಮಂ ವಾಗಾದಯೋಽನ್ಯಾ ದೇವತಾ ಅಗ್ನ್ಯಾದ್ಯಾಃ ; ನ ವಾಯುರಸ್ತಂ ಯಾತಿ — ಯಥಾ ಮಧ್ಯಮಃ ಪ್ರಾಣಃ ; ಅತಃ ಸೈಷಾ ಅನಸ್ತಮಿತಾ ದೇವತಾ ಯದ್ವಾಯುಃ ಯೋಽಯಂ ವಾಯುಃ । ಏವಮಧ್ಯಾತ್ಮಮಧಿದೈವಂ ಚ ಮೀಮಾಂಸಿತ್ವಾ ನಿರ್ಧಾರಿತಮ್ — ಪ್ರಾಣವಾಯ್ವಾತ್ಮನೋರ್ವ್ರತಮಭಗ್ನಮಿತಿ ॥